O PP achaca o retraso dos orzamentos de Lugo ás tensións entre PSOE e BNG na distribución do diñeiro

By 2 Decembro, 2021Economía

Ramón Carballo presenta baixo o paraugas de #CosPésEnLugo 76 propostas “para que a alcaldesa estude se son factibles para a súa incorporación ás contas para o 2022” e que buscan a reactivación económica, o benestar social, o compromiso co medio ambiente, o impulso do turismo e o deporte así como evitar o despoboamento no rural

O voceiro do Partido Popular Ramón Carballo asegura que “as tensións entre PSOE e BNG están retrasando a confección dos orzamentos municipais para o vindeiro 2022”. O popular reflexionaba que “está claro que se en decembro non sabemos nada, nin temos unha mínima previsión das contas municipais do vindeiro exercicio, é polas liortas que hai entre Méndez e Arroxo á hora de distribuír os fondos nese 60-40% no que quedaron no pacto de goberno”.

Para os populares a alcaldesa non ten desculpa para alargar no tempo o borrador de orzamentos “sobre todo tendo en conta o momento no que vivimos no que é, máis que nunca, importantísimo ter as ideas claras do que queremos investir”.

Carballo lembra como a estas alturas “a maioría das administracións xa  teñen aprobado, ou como mínimo trasladadas aos grupos da corporación, as previsións orzamentarias para o próximo ano”. O voceiro popular pregunta á alcaldesa e ao seu vicealcalde “cal é o problema para que empecemos decembro sen novas sobre os orzamentos municipais?; hai algunha razón que descoñezamos para que non nos convocasen a unha mesa de traballo para estudar as nosas achegas?”.

Dende o Grupo Popular sinalan que o lóxico sería presentar propostas de mellora dos orzamentos sobre un borrador oficial, pero “dado que non nos fixeron chegar ningún documento hoxe presentamos, baixo o paraugas de #CosPésEnLugo, 76 propostas que reflicten demandas de diferentes colectivos da cidade”. É un proxecto que nace das necesidades veciñais “intentamos manter os pés na terra fuxindo das ideas fantasiosas ou dos disparates que ultimamente estamos vendo na nosa cidade”.

Dado que o goberno de Lara Méndez mantén unha dinámica de traballo do “ordeno e mando” e á vista de que non nos convoca para dialogar e consensuar cal é o mellor proxecto orzamentario para o Lugo que queremos en 2022, o Grupo Municipal Popular rexistrou hoxe un documento propio con diferentes achegas.

Leave a Reply

6 − one =

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies