Castiñeira pregunta ao goberno “que ten que ocultar” coa licenza de reformas de Besteiro

By 31 Xullo, 2015Xaneiro 14th, 2016Urbanismo

O voceiro do GMPP critica que o goberno municipal remitise a documentación da licenza do edificio en vez de enviar, como se requirira explicitamente polos populares, a das obras de reforma da vivenda de Gómez Besteiro

O voceiro do Grupo Municipal do Partido Popular, Jaime Castiñeira, preguntou esta mañá en rolda de prensa ao goberno municipal “que ten que ocultar” en relación á licenza de obras para as reformas da vivenda do secretario xeral do PsdeG, José Ramón Gómez Besteiro.

O popular fixo estas declaracións logo de que o goberno socialista remitise ao Grupo Municipal do Partido Popular o proxecto de construción de todo o edificio de 28 vivendas de protección oficial en lugar de enviar a licenza de obras de reforma dunha delas, “como indicamos explicitamente no escrito de solicitude, no que, ademais, o único que se reclamaba era acceso e copia, non o envío do expediente ao GMPP”.

Nesa liña, Jaime Castiñeira explicou que “mentres que o documento que se nos facilitou data do 11 de xullo de 1972, o que nós queríamos coñecer era a licenza de obras do 3 de marzo de 2005, que por certo foi aprobada só oito días despois sendo concelleiro de Urbanismo o propio José Ramón Gómez Besteiro”. “Iso chámase axilidade, e iso que dixo que non se enterara ben cando asinara os papeis, pero para non enterarse foi ben áxil”, ironizou o voceiro popular no Concello de Lugo.

Á vista desta situación, o popular preguntouse “se Lara Méndez non ten nada que ocultar, ¿por que non nos entregou a documentación que lle pedimos?”. Deste xeito, Jaime Castiñeira subliñou que “claramente, igual que fixo onte no pleno, onde non quixo votar a favor dunha Comisión para a defensa dos intereses de todos os lucenses no tema do Garañón – non de investigación nin moito menos – dá a sensación que o que quere facer coa licenza é máis do mesmo: blindar e protexer a Gómez Besteiro”. “Con esta maniobra, a alcaldesa ratifica, igual que co seu voto no pleno de onte, que a súa principal preocupación é blindar os intereses do secretario xeral do PsdeG, en lugar dos de todos os lucenses”, resumiu.

En calquera caso, o voceiro popular anunciou que esta mesma mañá devolverá o expediente facilitado e que reiterará a petición de acceso ao da licenza das obras de reforma da vivenda “as veces que sexa necesario ata conseguir ver toda esa documentación”. “Como oposición temos dereito a consultar calquera documento do Concello e, evidentemente, a licenza de Gómez Besteiro forma parte tamén dos expedientes aos que debemos poder ter acceso”, indicou.

Por último, Jaime Castiñeira lembrou que solicitara acceso a todo o expediente de concesión da licenza das obras de reforma da vivenda para coñecer para que tipo de intervención se pediu autorización, “e a partir de aí poderase saber se o Concello fixo a comprobación oportuna de que as obras realizadas se axustan ao solicitado e, de non ser o caso, como todo parece indicar, se era necesario proxecto e se cumpriu todas as normativas de aplicación”, aclarou o popular. Así mesmo, o popular xa instara ao goberno municipal a abrir un expediente para que o secretario xeral do PSdeG abone o importe total da licenza en cuestión, logo de que no seu recurso Gómez Besteiro recoñecese un sobrecuste das obras da vivenda, segundo publicaron diversos medios de comunicación.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies