O PP urxe a convocatoria da mesa de transporte para poñer inmediatamente en funcionamento as novas liñas dos buses urbanos 

By 3 Novembro, 2020Transporte urbano

O concelleiro do Grupo Municipal do PP Antonio Ameijide argumenta a necesidade de convocar este órgano en que apareceron novos postes de información en diferentes paradas de bus urbano sen facer público o deseño definitivo para, a través do maior consenso, buscar o mellor servizo para os lucenses, algo que se fixo desde o Grupo Popular en conversas mantidas co responsable do transporte municipal

O concelleiro do Grupo Municipal do Partido Popular no Concello de Lugo, Antonio Ameijide, insta a Rubén Arroxo a convocar de xeito inmediato a mesa de transporte para explicar a todos os grupos os pasos a seguir dende a área de mobilidade, sobre todo, no referente ao transporte urbano.

Antonio Ameijide xustifica a necesidade de convocar a mesa de transporte debido a que se detectou a instalación de novos postes informativos das liñas de bus urbano en diferentes zonas da cidade. “Imaxinamos que se están a instalar novos postes informativos, pero urxe tamén renovar as marquesinas e poñer en marcha os paneis informativos e o SAE, pero antes de facer todo isto é preciso consensuar o deseño definitivo das liñas, xa que era o acordo que tiñamos con Arroxo tralas xuntanzas mantidas nos últimos meses”, sinalou.

O vicevoceiro popular explica que é preciso pechar e publicitar o máis axiña posible o deseño definitivo das novas liñas de transporte urbano para poder poñelas en funcionamento canto antes. “É preciso que entre todos busquemos o mellor deseño, dentro dos condicionantes que marca o contrato deste servizo, para dar aos cidadáns un servizo axeitado, áxil e que se axuste o máximo posible ás necesidades dos lucenses”, apuntou.

A importancia de acordar o novo deseño canto antes vén dado pola necesidade de transmitir as novas liñas á empresa concesionaria do servizo para que os propios condutores dos autobuses poidan estudar as mesmas para poñelas en funcionamento, algo que tamén é preciso transmitir con antelación á cidadanía para que teñan toda a información e poidan planificar con tempo os seus desprazamentos, xa que é de supoñer que cambiará nos horarios, os buses que teñen que coller e os transbordos.

O vicevoceiro popular tamén recalca a necesidade que este redeseño das liñas de transporte se acompañe de medidas como:

  • Abandonar as frecuencias dunha hora e apostar por frecuencias de entre 10 e 15 minutos
  • Gratuidade para menores de 18 anos, xubilados, pensionistas e persoas con escasos recursos, unha medida que se aprobou no pleno a iniciativa do Grupo Municipal Popular
  • A creación inmediata dunha APP para móbiles con información en tempo real e que permita calcular as rutas

Antonio Ameijide explica que se trata de pequenas innovacións pero que suporán unha pequena revolución para o transporte urbano de Lugo xa que o sistema actual “está anclado no pasado”. “Trátase de facer máis atractivo o servizo, algo para o que tamén se pode estudar a implantación de bonos semanais, mensuais ou anuais, cun prezo reducido, para animar aos lucenses a subir ao autobús urbano”, sinalou.

Leave a Reply

five − two =

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies