Non se trata da primeira ocasión na que se pide unha solución definitiva para este camiño no que hai anos xa se realizou unha actuación deficitaria
Os veciños da Garaballa de Abaixo xa están cansos de que o goberno de Lara Méndez e Rubén Arroxo non escoite a súa petición de arranxar a pista que une a Garaballa coa rúa Camiño do Souto, camiño que se atopa “en moi mal estado”, pola que non poden pasar dous coches ao mesmo tempo e na que todos os anos quedan varios coches atrancados xa que non hai asfalto.
Unha necesidade que os veciños defenden e para o que recolleron sinaturas en varias ocasións para instar ao goberno local a que arranxe este camiño, pero que seguen vendo como as súas reclamacións caen en saco roto.
Dende o Grupo Municipal do Partido Popular recordan como o Concello de Lugo realizou hai varios anos unha actuación nesta pista, unha intervención “deficitaria” e que non serviu para solucionar os problemas existentes xa que o estado de conservación segue a ser “moi malo”.
Os populares insisten na necesidade de arranxar este camiño polo que presentarán un rogo para que se realice o asfaltado en quente desta pista, ademais doutras intervencións, como a colocación dunha varanda, ou outro elemento de seguridade, para evitar calquera accidente ao paso dos vehículos por unha ponte.
