Sagrario Sánchez recorda que hai case un mes que o goberno local informou en comisión que estaban a piques de rematar os pregos da nova licitación deste servizo pero a realidade é que hoxe remata o contrato menor que asinaron e o terán que prorrogar ao non publicar as condicións que rexerán a nova licitación
Seguen pasando os días e os lucenses seguen a desesperarse ao ver como non se licita o novo contrato do servizo de atención cidadá 010, que deixou de funcionar o 8 de marzo.
Explica Sagrario Sánchez que dende o goberno local cada semana repiten o mesmo: “estamos traballando no novo contrato”, pero vemos como pasan os días e seguen sen atopar unha solución a este problema. A realidade é que hai case un mes que o goberno local informou que o contrato actual vence hoxe, 13 de maio, “polo que moito nos tememos que o prorrogarán xa que non avanzaron no novo contrato”. “Tirar de contratos menores non é máis que un mal parche”, lamenta a edil, que asevera que este servizo ten que funcionar ao 100% para resolver calquera dúbida que teñan os lucenses.
Recorda Sagrario Sánchez que na actualidade non se atende a todos os usuarios que chaman ao 010, xa que so hai capacidade para responder en torno ao 80 por cento das chamadas. “Hai que dar servizo ao 100% das chamadas, sen esquecer que hai que ampliar os servizos do 010, xa que na actualidade actúan coma unha centralita redirixindo as chamadas”, explicou.
