Educación

O PP ve “inquietante” a comparecencia de Manuel Núñez

By 31 Maio, 2016Sin comentarios

 O voceiro popular Jaime Castiñeira asegura que “os lugueses temos motivos para estar preocupados”, posto que “en ningún momento o PSOE foi quen de garantir que se continuará a prestar o servizo de comedores escolares no vindeiro curso”

O voceiro do Grupo Municipal do Partido Popular Jaime Castiñeira afirma que a comparecencia desta mañá do edil de Educación, Manuel Núñez, “é profundamente inquietante”, posto que “en ningún momento da súa declaración foi quen de garantir que o servizo de comedores escolares se continuará a prestar nos colexios públicos da cidade nos que viña ocupándose desta xestión o Concello ao longo do vindeiro curso”.

“É normal que todos os membros da comunidade educativa e o conxunto dos lugueses esteamos preocupados, porque igual que o socialista non foi capaz de aclarar o que pasou e o que está a pasar, tampouco asegurou que a partir de setembro estes centros vaian seguir con este servizo”, destaca Jaime Castiñeira, “o que dende todos os grupos da oposición estamos a reclamar que se manteña”

Así mesmo, o voceiro popular insiste en que “numerosos documentos, como actas de pleno e do Consello Escolar Municipal, escritos oficiais asinados por concelleiros socialistas, impresos de inscrición que a día de hoxe seguen nas webs dalgún centro da cidade, o programa electoral do PSdeG do 2011 e do 2015 ata recortes de prensa, pasando por los comunicados do Concello da web municipal, avalan que era a administración municipal quen se encargaba da xestión dos comedores escolares”, polo que “non cabe na cabeza de ninguén que en lugar de realizar unha mínima autocrítica, o edil de Educación se limitara a despexar balóns fóra, en lugar de asumir responsabilidades e dar explicacións que tranquilizasen á cidadanía”.

“O mínimo que cabe esixir diante dunha situación deste tipo é unha actitude sincera e de humildade, en lugar de comportarse como un elefante nunha cacharrería, que foi o que vimos no pleno desta mañá”, opina Jaime Castiñeira, se ben recoñece que “a arrogancia dese edil é a mesma, con independencia de que se fale dos límites territoriais da parroquia de Curutelo ou dos comedores escolares”. “Ten unha capacidade ilimitada de dicir unha cousa e a contraria en dous minutos e non poñerse colorado”, asevera o popular.

Por último, o voceiro popular ironiza con que “a verdadeira preocupación deste goberno non foi nunca a conciliación familiar senón a conciliación de intereses coas empresas para esa xestión de cercanías que patentaron Orozco e Liñares”. “Externalizaron compulsivamente servizos sen ter reparo ningún en que ducias de firmas privadas sigan traballando para o Concello de Lugo sen ningún respaldo contractual en vigor”, conclúe. 

Responder

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies