SeguridadeServizos xeraisTransparencia

O PP propón recordatorios de distanciamento social nos mupis, marquesiñas, en autobuses e nos semáforos de cruces con aglomeracións

By 1 Maio, 2020Sin comentarios

O voceiro do Grupo Municipal do Partido Popular Ramón Carballo sinala que sería preciso que o Concello de Lugo distribúa á cidadanía toda a información precisa para recordar as medidas de distanciamento social agora que comezan as diferentes fases da desescalada para evitar unha nova propagación do Covid-19.

O voceiro do Grupo Municipal do Partido Popular no Concello de Lugo, Ramón Carballo, insta ao goberno local a tomar as medidas necesarias para que a cidade sexa unha zona segura e na que todos os lucenses teñan claras as recomendacións das autoridades sanitarias nas diferentes fases da desescalada.

Ramón Carballo sinala que o Concello de Lugo debería estudar a posibilidade de poñer en marcha diferentes canles de comunicación coa cidadanía para recordar as distancias de seguridade para evitar a propagación do coronavirus. Diferentes medios como poden ser: carteis nos mupis que o Concello ten repartidos pola cidade (o Concello de Lugo conta con 80 marquesinas e mupis de titularidade municipal), publicidade nos autobuses de transporte público ou empregar a megafonía municipal do Concello e de diferentes prazas para emitir mensaxes á cidadanía, algo ao que tamén se pode sumar a Policía Local a través dos seus vehículos cando detecten algunha aglomeración de persoas ou coa megafonía dos semáforos durante a fase de cor vermella que impide cruzar aos peóns, mantendo o sinal acústico habitual na fase de cor verde para que as persoas invidentes poidan cruzar con seguridade, entre outras medidas.

Carteis e mensaxes recordando as recomendacións de distanciamento social, algo ao que se podería engadir que o Concello de Lugo colocase sinais visuais nas beirarrúas dos cruces con máis afluencia de público. “O que debemos facer desde o Concello de Lugo é recordar as medidas sinaladas polas autoridades sanitarias e facer todo o que estea nas nosas mans para que os veciños de Lugo se manteñan seguros agora que se inician as diferentes fases da desescalada”, sinala.

Neste senso, o voceiro popular lamenta “a falta de traballo e dilixencia” do bigoberno, xa que hai máis dun ano e medio que se retiraron os paneis informativos da hora e da temperatura das rúas da cidade e se anunciou que se instalarían outros multimedia que ofrecerían unha información moito máis amplía á cidadanía. “Unha vez máis comprobamos como as promesas deste goberno local non serven de nada, xa que a cidade segue sen contar con ese tipo de dotacións que neste momento serían moi útiles para ofrecer aos lucenses toda a información relacionada co Covid-19”, afirma.

Para Ramón Carballo o goberno local debería adoptar de inmediato este tipo de medidas xa que as están a adoptar, estas e outras directrices, todo tipo de establecementos privados que nos vindeiros días abrirán de novo as súas portas ao público.

Responder

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies