Os populares destacan que a alcaldesa decidiu aplicar “o seu habitual rodillo” tamén á veciñanza ao manter a súa decisión de desviar o tráfico pola rúa Nova pese ás reiteradas peticións do PP, da veciñanza e das asociacións para realizar un plan alternativo que garanta a seguridade
Hoxe comezaron as obras de peonalización do casco histórico, uns traballos nos que Lara Méndez decidiu aplicar aos lucenses o mesmo rodillo que aplica nos plenos do Concello de Lugo: manter as súas decisións, sen buscar consensos nin escoitar a ninguén, a pesar de que estes traballos vaian a afectar directamente a moitos veciños e empresarios do centro da cidade.
Recordan os concelleiros populares que a semana pasada tanto a alcaldesa como o vicealcalde negáronse a apoiar no pleno unha proposta do PP para redeseñar o plan de tráfico destas obras que prevén desviar o tráfico das rúas Bolaño Rivadeneira e Montevideo pola rúa Nova, unha vía estreita, de entre 5 e 6 metros de ancho, que hai 24 anos que é peonil, e na que conflúen centos de vehículos.
Hai menos dun mes, Lara Méndez afirmaba que o plan de tráfico “non estaba pechado” pero tras ver como se nega a escoitar á veciñanza e ao PP queda claro que “a rexedora mentiu unha vez máis e non lle importa ningunha opinión máis aló da súa propia”, chegando dende o goberno local a insultar aos representantes da asociación que defende aos veciños, autónomos e empresarios do centro.
O plan de tráfico de Lara Méndez “é un despropósito” e o peor é que “en ningún momento tiveron a mínima intención de buscar consensos” cando semella que o máis lóxico sería “desviar todo o tráfico pola Praza do Ferrol, habilitando a porta de San Fernando de dobre sentido de circulación”.
O que conseguirá Lara Méndez, coa complicidade de Rubén Arroxo, é que pola Rúa Nova, unha vía pola que camiñan miles de persoas a diario, haxa miles de vehículos circulando cada día por unha rúa que ten un ancho de entre 5 e 6 metros.
Para os populares queda claro que canalizar o tráfico pola rúa Nova “é un erro” poñendo de relieve que “non se poden levantar ao mesmo tempo a Praza do Ferrol e Montevideo e Bolaño Rivadeneira sen crear perigos innecesarios” xa que se trata dunhas zonas que concentran accesos a aparcadoiros públicos e privados, un colexio, un instituto, numerosos comercios e negocios, un centro de saúde e un hospital. “Quen van asumir os danos na rúa e as perdas dos negocios?”, preguntan.
Dende o Grupo Municipal Popular preguntan ao goberno de Lara Méndez que vai a pasar cando os negocios e comercios vexan como se resinte a súa facturación “froito da improvisación de PSOE e BNG”, algo para o que dende o Partido Popular “poñémonos a disposición dos afectados para axudar en todo o que precisen, dende analizar o proxecto de peonalización e o plan de tráfico ou tramitar as reclamacións que estimen oportunas”.
