Os populares afirman que “hai que darlle unha voltiña ás obras de pavimentación no rural que quedaron a medio facer” e que se executaron con cargo aos remanentes de tesourería grazas aos acordos impulsados polo Partido Popular
O concelleiro do GMPP Manuel López reclama ao goberno local que remate as obras de pavimentación de pistas que se deixaron a medias no rural. Tras unha visita á que asistiu tamén o voceiro do PP JaimeCastiñeira, os populares enumeraron as deficiencias atopadas e que se repiten nalgúns puntos. “Hai alcantarillas sen tapas de protección que supoñen un perigo, tamén atopámonos con cunetas sen limpar ou outras nas que se deixou pouca pendente o que provoca, que nos días de chuvia, haxa inundacións e asolagamento do firme”.
Manuel López tamén fixo referencia “á falla de visión do goberno socialista que desaproveitou a oportunidade de ensanchar as pistas nas que se actuou”. “Atopámonos zonas nas que era posible ampliar o firme para gañar en seguridade vial pero os socialistas conformáronse con deixar mesmo menos do que había” lamentou o popular.
O concelleiro do PP solicitou ao responsable de Medio Rural que inspeccionen as obras realizadas cos remanentes de tesourería dos últimos anos e que se acordaron grazas ao apoio do Partido Popular. Para o Grupo Popular “os veciños do rural teñen dereito a que as obras que lles fan queden ben rematadas e non a medias, con flecos como se os que residen nas parroquias fosen cidadáns de segunda”.
O popular matizou que “a falla de calidade das obras nas pistas pode responder ás présas de última hora xa que a maioría dos asfaltados fixéronse xusto antes das eleccións de decembro”.
