O Grupo Municipal do PP abstívose na votación do pleno de organización, que se celebrou este mediodía, manifestando que a proposta que puxeron sobre a mesa socialistas e nacionalistas “non é o noso acordo”.
Dende o Partido Popular poñen de manifesto que o sentido do seu voto é a consecuencia directa de que “non temos capacidade algunha para modificalo” lembrando como a suma de concelleiros do PSOE e do BNG é suficiente para aprobar os gastos políticos da nova corporación.
Os populares engaden que pese a todo “non cremos que este debate teña que ser o comenzo da nosa acción política neste mandato”.
Dende o Grupo Municipal do PP salientan que “agora que o goberno o decidiu, o noso traballo como oposición onde nos colocaron os partidos que perderon as eleccións, centrarase en que o gasto que se vai aprobar repercuta na resolución dos problemas que ten a cidade”.
“O noso compromiso e a nosa responsabilidade será a de fiscalizar, de forma seria e intensa, que o custe económico deste acordo do PSOE e BNG repercuta nunha xestión eficiente e tamén eficaz de cara á veciñanza”.
