Sagrario Sánchez denuncia que pouco máis dun ano despois da inauguración da praza este edificio presenta deficiencias importantes como filtracións de auga e goteiras no soto, falta de limpeza e que a calefacción non funciona “ben porque non se acende ou porque non funciona”
O Concello de Lugo inaugurou a reforma da Praza de Abastos hai pouco máis dun ano, o 9 de outubro de 2021, unha obra moi agardada pola cidadanía e que en pouco máis de 365 días non deixou contento a ninguén.
Sagrario Sánchez explica que nas últimas semanas “o enfado é moi grande entre os praceiros” xa que hai circunstancias imposibles de entender. Entre as principais queixas están as constantes filtracións de auga e goteiras que hai no soto. “Ninguén entende esta situación de abandono na que PSOE e BNG teñen aos praceiros”, apunta.
A concelleira popular sinala que aínda hai máis. No contacto constante que mantén a popular tivo tempo suficiente para comprobar como o enfado dos titulares dos postos vai a máis. Non se pode entender que non funcione a calefacción, a falta de limpeza, as deficiencias construtivas que non se amañan como un escalón que provoca esvaróns ou os constantes cambios de horario que teñen que sufrir os praceiros baixo o “ordeno e mando de PSOE e BNG”. “O sentimento entre a maior parte dos praceiros é de enfado e fartura”, lamentou.
Outra das principais queixas é que agora o goberno local decidiu quitar as chaves da praza a case todos os titulares dos postos, polo que xa non poden levar a mercancía cando poden “un problema grave xa que non poden recibir sempre os subministros no horario de apertura da praza”.
Comisión da praza e mercado
Sagrario Sánchez tamén denuncia que tras aprobarse no pleno de abril, a iniciativa do PP, a convocatoria da comisión consultiva da Praza e do Mercado o goberno local aínda non convocou este órgano que da voz aos praceiros. “Xa vemos canto vale a palabra de Lara Méndez”, criticou a popular, que engadiu que “seguramente a rexedora non se atreve a verse cos titulares dos postos sabedora do descontento que teñen”.
