Antonio Ameijide denuncia que Lara Méndez tenta quedar libre de toda culpa neste procedemento, erixíndose en impulsora do expediente e en persoa que resolve, en lugar de inhibirse, cando en realidade debería ser unha das investigadas ao non atender os requirimentos da Confederación Hidrográfica Miño-Sil
O Grupo Municipal do Partido Popular acusa directamente a Lara Méndez de tentar manipular o procedemento que dirimirá a responsabilidade do anterior equipo de goberno na perda da concesión de explotación da Fábrica da Luz e pola que houbo que indemnizar á empresa concesionaria con case 2.5M€.
Antonio Ameijide fai esa reflexión despois de ter acceso a un decreto que onte mesmo asinou a alcaldesa para dar inicio á depuración de responsabilidades, documento no que tenta “adxudicar parte da responsabilidade a un técnico municipal”, técnico que “realizou unha labor totalmente profesional e intachable” xa que en todo momento advertiu, tanto á alcaldesa como a Daniel Piñeiro, da necesidade de asinar a solicitude de prórroga da concesión.
Recorda o vicevoceiro municipal popular que tanto o técnico como dende este grupo municipal recordouse en numerosas ocasións a necesidade de tramitar a petición de prórroga para non perder a concesión.
- 30/09/2016: Data na que se pon na mesa de Daniel Piñeiro a documentación para a solicitude de prórroga. Só ten que asinar os documentos
- 11/11/2016: O Concello solicita a prórroga ante a CHMS, pero fóra de prazo. Un mes e medio despois de que a documentación se puxese na mesa de Daniel Piñeiro para que a asinase
Para Antonio Ameijide, Lara Méndez debería apartarse deste procedemento no que se debe dirimir a súa posible responsabilidade, pero aínda máis curioso é que no decreto que asinou onte mesmo “unicamente se nomea como presuntos responsables a un técnico municipal e a Daniel Piñeiro”.
“Estamos ante uns dos asuntos de máis envergadura deste mandato e queremos que se faga xustiza para evitar que os lucenses volvan ser os que paguen as malas decisións, as neglixencias e as chapuzas da alcaldesa de Lugo e o seu equipo na caducidade da concesión da Fábrica da Luz”, explicou Ameijide, que continuou afirmando que “Lara Méndez é a máxima responsable das decisións que se toman neste Concello e ela estaba ao tanto da situación, polo que non pode escorrer o bulto e debe inhibirse deste proceso por se ten algún tipo de responsabilidade”.
Antonio Ameijide recorda o que xa se dixo dende o Grupo Municipal Popular en varias ocasións: “Estamos dispostos a pelexar ata as últimas consecuencias e esgotar todas as vías legais para conseguir que se depuren responsabilidades políticas para que os políticos responsables dos despropósitos da Fábrica da Luz paguen do seu peto a indemnización (2.434.352,16€) e os custos que supoñen as malas decisións adoptadas sobre a xestión deste inmoble xa que os técnicos municipais non teñen culpa algunha, ao contrario, agradecemos enormemente o seu traballo e as reiteradas advertencias que realizaron para que se asinara a solicitude de prórroga en tempo e forma”.
A situación é moi sinxela: “se non as fas, non as temas” polo que insistimos, “a alcaldesa é parte responsable, polo que non pode irse de rositas e tentar cargar a culpa aos demais”.
Dende o Grupo Municipal Popular lembran que “sempre defendemos que deben pagar os políticos responsables os máis de 2,4M€ de indemnización á concesionaria que os xuíces sentenciaron, en lugar de castigar aos lucenses para pagar pola neglixencia da alcaldesa e o seu equipo que son os únicos culpables”.
