InfraestruturasMedio Ambiente

O PP di que a ‘vendetta’ de Tomé con Santos cústalle aos lucenses 225.385€ e a seguir sen praia fluvial un ano máis

By 30 Abril, 2021Sin comentarios

Antonio Ameijide explica que este axuste de contas de Tomé con Santos débese ao enfrontamento entre a liña de Besteiro e a de Caballero, enquistada aínda máis tralas declaracións do concelleiro socialista recriminando ao presidente da Deputación a súa actitude sobre a vestimenta de Elena Candia.

O vicevoceiro do Grupo Municipal do Partido Popular no Concello de Lugo, Antonio Ameijide, asegura que a reclamación que a Deputación realiza ao Concello por non executar a praia fluvial obedece unicamente a unha ‘vendetta’ persoal de José Tomé con Álvaro Santos.

Antonio Ameijide explica que o ente provincial esixe a Méndez e Arroxo que devolvan a subvención de 225.385€ por non executar esta zona pública de baño no Miño, e seguramente non sexa casual e débase ás liortas internas do PSOE, aínda máis enquistadas tralas declaracións públicas do presidente da Deputación sobre a forma de vestir da deputada e presidenta provincial do PP, Elena Candia.

Santos criticou duramente a Tomé por esas declaracións e agora o presidente provincial toma o seu desquite esixindo a devolución deses cartos. “Vemos como o PSOE segue a castigar aos lucenses polas súas liortas internas. Vemos como a dualidade Caballero-Besteiro segue a pasar factura a Lugo. Os socialistas en lugar de axustar contas na súa sede utilizan as institucións públicas para facer unha guerra de bandas”, sentenciou.

A praia fluvial de Lugo, sine die

O peor da liorta interna do PSOE é que Lugo tampouco terá este verán unha zona pública de baño, que se debe unicamente á desidia de Lara Méndez e Rubén Arroxo, xa que non presentaron a documentación para solicitar a praia fluvial para a cidade, a pesar de ter concedido o permiso da Confederación Hidrográfica.

O 4 de novembro de 2020 a Confederación Hidrográfica autorizou ao Concello a instalar unha zona pública de baño no Miño entre o 15 de xuño e o 15 de setembro, pero nin Lara Méndez nin Rubén Arroxo fixeron nada dende o Concello de Lugo para contratar o acondicionamento desta zona.

Ademais desta autorización, tamén precisa o visto e prace de Sanidade, que ten que certificar que a zona elixida cumpre con todos os requisitos sanitarios e non hai riscos para a saúde pública. Pero nin rexedora nin vicealcalde realizaron ante Sanidade a solicitude para inscribirse no rexistro galego de zonas públicas de baño, que rematou o 1 de febreiro, como cada ano.

Para o vicevoceiro popular “non hai auga suficiente no Miño que lave” nin a Méndez nin a Arroxo, xa que son os únicos que poden facer que Lugo e os lucenses teñamos unha zona pública de baño no río, ao igual que moitos outros concellos da nosa contorna, coma Outeiro de Rei ou O Corgo. “Da alcaldesa podiamos agardar algo así, pero o certo é que pensábamos que Arroxo tería algo máis de amor propio e loitaría polo que era o seu proxecto estrela da campaña electoral”, sinala o popular, recordando as fotos que se realizou o nacionalista na beira do Miño reclamando esta dotación para Lugo cando estaba na oposición, chegando incluso a presentar un proxecto ante a Confederación Hidrográfica, convidando aos lucenses a presentar alegacións ao mesmo no período de exposición pública.

O que queda claro, segundo confirma Antonio Ameijide, é que Rubén Arroxo e o BNG son o “socio perfecto” para Lara Méndez, o seu “convidado de pedra necesario” para poder facer e desfacer ao seu antollo e seguir paralizando Lugo.

Responder

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies