- Os populares lembran que, por iniciativa do PP, se puxo en marcha a maquinaria administrativa para impulsar esta dotación “conseguimos que viñeran en decembro os técnicos do Ministerio do Interior para analizar as tres posibles ubicacións, seleccionaron a parcela e agora só queda que o concello cumpra a súa parte”
- Dende o PP aclaran que “se agora está bloqueado o proxecto para construír a nova Comisaría da Policía Nacional é pola falta de traballo do goberno local que aínda non tramitou a cesión das parcelas que teñen que pasar pola aprobación do pleno, un paso esencial para avanzar no proxecto”
- Outros proxectos paralizados por falta deste trámite son o Centro de saúde do Sagrado Corazón ou a construción de máis vivenda pública. En ambos casos a administración autonómica continúa á espera de que o concello lle entregue os terreos
SÁBADO 24 DE FEBREIRO DE 2024
O Partido Popular levará ao vindeiro pleno unha pregunta para clarificar onde decidiu o goberno de Sánchez construír a nova Comisaría da policía nacional.
Os populares piden concreción sobre a ubicación lembrando que xa pasaron máis de dous meses da visita realizada polos técnicos do Ministerio para analizar as tres alternativas que había sobre a mesa: o edificio de obras públicas ou as parcelas municipais do Castiñeiro ou Abella.
Se houbera unha vontade real e se para o goberno local fose unha prioridade que Lugo teña unha nova Comisaría debería estar xa tramitando a cesión da parcela municipal seleccionada.
Os populares, dende o primeiro momento, amosaron a súa predisposición a calquera alternativa sempre que fose áxil a construción e cubrise tanto as necesidades da ciudadanía como dos axentes da policía, tal e como explicaron no pleno de novembro de 2023 na iniciativa que defenderon no pleno.
Hai que lembrar que a proposta que presentou o PP en pleno con varias ubicacións para construír a nova comisaría foi fundamental para conseguir que o goberno local asumira o compromiso de construír esta dotación na zona norte.
