Urbanismo

O PP denuncia que na primeira metade do ano só o 18% das licenzas resoltas para a cidade se concederon en menos de 90 días

By 23 Agosto, 2021Sin comentarios

O concelleiro do Grupo Municipal do PP Manuel López lamenta que o goberno local so concedese dentro do prazo legal establecido, que é de 90 días, 20 das 111 licenzas aprobadas para o ámbito urbano nos primeiros seis meses do ano, un claro síntoma dun goberno bloqueado e paralizado no que as liortas internas xa propiciaron incluso a dimisión dun concelleiro

Semella que o goberno local liderado por Lara Méndez e Rubén Arroxo non aprende dos erros do pasado e lonxe de poñerse a traballar en prol da mellora da vida dos lucenses, seguen enfrascados na súa marcaxe persoal, con dimisións de concelleiros incluídas, paralizando a actividade municipal.

O concelleiro popular Manuel López fai esta reflexión despois de avaliar os datos obtidos das licenzas aprobadas nos primeiros seis meses do ano para o ámbito urbano, uns datos “desastrosos” que amosan ás claras “a falta de traballo dun equipo de goberno desgastado e superado pola realidade”.

Se Lara Méndez e Rubén Arroxo pecharon o ano 2020 situando o prazo medio para a resolución dunha licenza no eido urbano en 330 días de media, o inicio de 2021 non foi positivo, xa que nos primeiros seis meses do ano este dato disparouse ata os 420 días de media, “un dato que amosa claramente que o mellor é un relevo á fronte do goberno local”.

Manuel López amosouse moi preocupado despois de analizar estes datos, xunto aos que xa se fixeron públicos a semana pasada sobre o referente ás parroquias do rural, que amosan unha sintomatoloxía clara: “en Lugo temos un goberno que está a debullar un panorama desolador”.

Explica o concelleiro popular que todos estes datos referentes á resolución de licenzas obtivéronse das actas das xuntas de goberno local, polo que “a ver que escusa se sacan da manga agora tanto Méndez como Arroxo para tentar lavar a cara”.

Durante os primeiros seis meses do ano, no ámbito urbano, resolvéronse 111 solicitudes de licenza, das que so 20 se tramitaron dentro dos 90 días que marca a lei, é dicir, só o 18% das solicitudes de licenza resoltas durante os primeiros seis meses do ano cumpriron os prazos legais establecidos. Seguramente, o goberno local recupere a escusa de que son os particulares os que ralentizan a tramitación, circunstancia que aproveita o concelleiro popular para enviar unha pregunta directa ao equipo de goberno: “de verdade pensan que un particular que quere realizar unha obra vai a paralizar a súa petición?. Dicir iso é facerse trampas ao solitario”.

No informe elaborado polos populares hai datos reveladores como que, de media, ningún dos aspectos avaliados cumpre o prazo marcado na lei.

 

Tipo de obra Media (en días) Prazo Máximo (en días) Importe medio Importe total
Ascensores 182 660 51.284,46 € 974.404,73 €
Edifico 492 1560 321.141,62 € 9.313.107,07 €
Outros 493 1721 260.224,12 € 6.505.602,89 €
Reformas 420 2701 74.630,41 € 1.791.129,84 €
Tellados 377 524 33.510,75 € 67.021,50 €

 

A realidade é que tanto Lara Méndez coma Rubén Arroxo están a poñer en risco numerosos postos de traballo, xa que a construción é un dos principais motores económicos da cidade e que tendo en conta so as licenzas avaliadas para o ámbito urbano nos primeiros seis meses do ano xeraron un volume de negocio de 18.651.266,03 €.

Chegados a este punto, dende o Grupo Municipal Popular esixen ao goberno local unha “reacción inmediata que non se pode demorar máis” e que pasa polo reforzo do persoal de todos os departamentos que interveñen na resolución de licenzas, xa que “nos consta que todo o persoal que intervén no proceso está a dar o 110%, polo que urxe un reforzo para axudar a aliviar a carga de traballo e axilizar a resolución das peticións de licenza”.

Responder

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies