Ameijide replica á alcaldesa que “a ordenanza de urbanismo que di estar ultimando tiña que estar operativa hai un ano, segundo o prazo dado pola propia Lara Méndez” e pídelle “acougo para frear a espiral na que se está metendo como consecuencia do seu nerviosismo”
O Partido Popular lamenta que “ás présas da alcaldesa por xustificar o seu soldo no Concello de Lugo antes de que se celebren as eleccións” e pídelle acougo para frear a espiral de anuncios de “cuestións que xa tiñan que estar resoltas hai anos”.
O vicevoceiro do PP recriminou o intento do PSOE de “tomar por tonta á veciñanza de Lugo”. Así interpreta o Grupo Popular o anuncio “da ordenanza de urbanismo, unha normativa que debía estar operativa segundo os propios prazos que deu á alcaldesa nunha comparecencia pública celebrada en maio de 2021. “Lara Méndez comprometeuse a ter este documento a finais do ano 2021 polo que, a estas alturas e despois de anos de bloqueo de licenzas, cunha media de resolución de 300 días do primeiro informe, non é de recibo que presuma de que se vai a reducir a burocracia”.
Os populares comprenden o nerviosismo da alcaldesa manifestando que “na cidadanía hai cansazo e cero credibilidade con que este bigoberno sexa capaz de impulsar un cambio neste departamento”.
Dende o PP lembran como neste mandato de catro anos se designou un coordinador de área e pasaron ata 3 concelleiros de urbanismo, un deles marchou como consecuencia dunha vendetta política; tamén lembran o escándalo da anulación do nomeamento do Xefe do Servizo de Arquitectura que recorreu e a xustiza fallou contra o Concello.
Con semellante panorama “é comprensible o nerviosismo da alcaldesa xa que a situación na resolución das licenzas en Lugo é cada vez máis rocambolesca, provocando unha perda de oportunidades e emprego xa que son poucos os que se atreven a investir no noso municipio”.
O Grupo Popular lembra como en materia de urbanismo fixo numerosas propostas útiles para mellorar o funcionamento deste departamento e entre as últimas citar:
- Resolver en 30 días calquera proxecto que veña acompañado dunha certificación de conformidade á legalidade urbanística e ao planeamento aplicable, emitida por unha entidade de certificación de conformidade municipal.
- Tamén propuxemos que nas consultas realizadas en urbanismo para pedir licenzas de obra se dea a resposta por escrito co ánimo de evitar problemas por interpretacións distintas dos técnicos e xerar inseguridade ao cidadán que queira facer unha obra en Lugo.
- Así mesmo o Grupo Popular solicitou crear un foro permanente de traballo en materia urbanística para buscar saídas en consenso a cuestións relativas ao impulso da rehabilitación de vivendas, bases de actuación para zonas sensibles da cidade, unificar criterios para a selección do mobiliario urbano…”
