Os populares valoran o apoio maioritario da corporación (Cidadáns abstívose) á proposta para que Lugo albergue a Axencia Estatal de Saúde Pública xa que o concello de Lugo é unha localización estratéxica dado que no noso concello temos o Laboratorio Central de Saúde Pública de Galicia.
No mes de agosto o Ministerio de sanidade publicaba o anteproxecto de lei polo que se crea a ‘Agencia Estatal de Salud Pública’ coa finalidade de prestar unha atención integral á saúde.
Tras unha pandemia sen precedentes, faise preciso poñer en marcha medidas para apoiar a recuperación sanitaria e impulsar un proceso de transformación estrutural que permita unha atención integral á saúde. Para isto establécese a necesidade de configurar un organismo público que preste asesoramento para o deseño de intervencións, a avaliación do impacto e a redución de inequidades na saúde.
Neste contexto, no que se recoñece a existencia dunha necesidade, nace a figura da ‘Agencia Estatal de Salud Pública’. Unha figura que tal como recolle a exposición de motivos do Real Decreto que regula o procedemento de elección de sedes para as novas axencias, tomará en consideración factores como a tendencia demográfica, algo que fai da nosa provincia e da nosa comunidade unha firme candidata a albergar estas instalacións. Se a isto se lle suma que a Xunta de Galicia xa ten na cidade de Lugo o Laboratorio Central de Saúde Pública, que a día de hoxe é un referente a nivel nacional no eido da seguridade alimentaria e da sanidade ambiental, podemos afirmar que Lugo conta con valores moi notables para conquerir o obxectivo que se plantea.
Esta iniciativa nunha cidade como Lugo e nunha Comunidade como Galicia, serviría para consolidar un proxecto que conta cunha larga e profunda tradición en todo o relacionado co campo da sanidade, ao mesmo tempo que supón unha dotación máis que permite impulsar socioeconómicamente a cidade.
Como centro neurálxico en materia sanitaria para España e co apoio dos diferentes organismos que xa existen na cidade, reforzarase a coordinación das distintas institucións e das acción levadas a cabo en cada unha delas, xenerando sinerxias entre os diferentes centros relacionados coa saúde pública, permitindo levar a cabo asesoramento técnico para aquelas intervencións que nesta materia leven a cabo as diferentes administración públicas, organismos ou institucións.
Xa que logo estamos en disposición de afirmar que Lugo é a mellor candidatura para esta infraestructura e que a nosa cidade merece esta oportunidade. Co apoio a esta iniciativa dase un novo pulo ao importante esforzo inversor en materia sanitaria que está a facer a Xunta de Galicia en Lugo.
Por todo isto, o Grupo Municipal do Partido Popular, que subscribe esta proposición, considera de interés municipal que o Pleno da Corporación Municipal acorde:
- Impulsar e respaldar dende o Concello de Lugo a solicitude para que a ‘Agencia Estatal de Salud Pública’ se instale en Lugo.
