O Grupo Municipal Popular de Lugo agradece á Xunta de Galicia a actuación levada a cabo na LU-546, no seu entronque en Nadela, que inclúe a reparación da zona de estacionamento diante do Centro de Saúde. Esta intervención responde ás peticións veciñais e supón un avance en seguridade e accesibilidade para os usuarios do consultorio.
O pasado 17 de febreiro, durante a presentación da proposta do Grupo Popular para humanizar este tramo, os veciños trasladaron a necesidade de mellorar este espazo, que presentaba desperfectos e dificultaba a mobilidade. Con esta obra elimínanse os problemas de acumulación de gravilla na calzada, mellorando tanto a seguridade viaria como a comodidade para os usuarios.
Tralas xestións realizadas polo Grupo Municipal Popular, a Xunta actuou con axilidade para atender esta demanda, e hoxe os traballos xa están en marcha. “Agradecemos a rápida resposta da Xunta, porque estas melloras supoñen un beneficio directo para os veciños de Nadela”, destacou a portavoz popular, Elena Candia.
O Grupo Popular reafirma así o seu compromiso de seguir trasladando as demandas da cidadanía ás administracións competentes, impulsando solucións que melloren o día a día dos lucenses.
