Transporte Urbano

Ameijide: “los buses pierden 230 usuarios cada día desde que llegó Lara Méndez”

By 29 marzo, 2017No Comments

El viceportavoz del Grupo Municipal del PP, Antonio Ameijide, afirma que “la nefasta gestión de la alcaldesa al frente del Ayuntamiento también se aprecia en el transporte urbano, con una cifra de viajeros que toca fondo al ser la peor de la década”

O vicevoceiro do Grupo Municipal do Partido Popular no Concello de Lugo, Antonio Ameijide, critica que “dende a chegada de Lara Méndez á alcaldía os autobuses urbanos perderon, de media, uns 230 usuarios cada día”.

“Son cifras que lle farían pensar a calquera pero, transcorrida a metade de mandato, a única impresión que nos queda é que á alcaldesa este asunto non lle interesa en absoluto”, asegura Ameijide, quen sostén que “a única preocupación de Méndez con este tema foi empregalo como pretexto para a súa xira polos barrios de Lugo”. A este respecto, apunta que “con esta cuestión a alcaldesa está a perder a enésima oportunidade de demostrar que realmente pode ser útil aos lugueses, así como de rematar coa sensación que cada día teñen máis veciños, que é que a alcaldesa só é marketing, porque é o único que lle viron ata o momento”.

En opinión do popular, “a ninguén se lle escapa que unha redución tan drástica de 150.000 usuarios en menos de dous anos non ocorre por casualidade”, senón que é a consecuencia de “moitos meses de pasotismo por parte do goberno con respecto ao transporte urbano”, xa que “primeiro Orozco e agora Méndez se amosaron totalmente incapaces de ofrecer estímulos que revertan esta tendencia tan preocupante”. Deste xeito, Ameijide lamenta que “Lara Méndez non só non convocou a mesa de traballo promovida dende o PP para abordar, de xeito urxente, todos os cambios senón que nin sequera presentou a remodelación que debera ter feito do sistema durante o primeiro ano do novo contrato”.

Proposición plenaria.-

O vicevoceiro popular anuncia que, co obxecto de paliar a “inacción” da alcaldesa en materia de transporte público, trasladará ao pleno de mañá a terceira proposición do mandato encamiñada a que os socialistas convoquen “mellor o venres que o luns” a mesa de traballo como órgano de participación da oposición para promover as modificacións necesarias “ata facer atractivo e útil” este sistema.

A este respecto, Ameijide reitera algunha das propostas que trasladará a este foro, como o redeseño estrutural con liñas máis curtas, mellores frecuencias e que dean cobertura a toda a cidade e municipio; transbordos gratuítos; revisión das tarifas e establecemento de tarifas planas e bonos semanais, mensuais e anuais; a gratuídade para menores de 18 anos tal e como está aprobado neste pleno, así como para pensionistas e persoas con escasos recursos; os reforzos do servizo nas fins de semana; a adaptación dos horarios ás entradas de institutos, colexios, empresas, universidade…; a mellora das marquesinas e dos sistemas de información, recuperando e potenciando o SAE; a creación dun plano de transporte intuitivo e cómodo coma o do metro, con información axeitada en papel, marquesinas, hoteis… e a creación dunha APP para móbiles, con planificador de rutas e información en tempo real.

“No pleno de mañá volveremos a procurar a unanimidade dos grupos políticos para que a alcaldesa desatasque, dunha vez por todas, un asunto que o goberno local non parece disposto a abordar”, conclúe.

Responder

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies