O Grupo Municipal do Partido Popular celebra a apertura dos aparcadoiros dos institutos de Lugo, unha demanda histórica da Asociación de Veciños Parque de Rosalía-Recatelo que, por fin, ve cumprida gracias ao traballo constante e á insistencia deste grupo que defendeu esta necesidade dende o primeiro momento.
· O aparcadoiro abrirá en horario compatible coa actividade docente e de xeito seguro
· O Partido Popular contribúe deste xeito a dar solucións aos problemas de mobilidade orixinados pola xestión de PSOE e BNG“Dende que recibimos esta petición veciñal, comprometémonos a buscar unha solución efectiva e áxil. Durante meses, fomos testemuñas de como o goberno local intentaba desviar responsabilidades cara á Xunta de Galicia, escudándose en supostos atrasos administrativos. Porén, os feitos demostraron que a falta de dilixencia estaba unicamente na súa “casa””, indicou a voceira popular, Elena Candia.
En canto o goberno local convocou as Xuntas Locais de Seguridade pertinentes e aprobou os convenios da súa competencia, os trámites avanzaron con axilidade. De feito, a sinatura dos convenios tivo lugar na Xunta Local de Seguridade do pasado 18 de xullo e, pouco máis de 15 días despois, asistimos á apertura dun espazo moi necesario para o barrio, como tamén o é para moitas outras zonas da cidade que sofren unha grave carencia de prazas de estacionamento.
“Esta actuación supón unha mellora importante para o día a día da veciñanza, e dende o Grupo Popular seguiremos traballando con responsabilidade e compromiso para dar resposta ás necesidades reais de Lugo, sempre coa man tendida ao diálogo e cunha actitude proactiva e resolutiva”, destacan os populares.
