• Os populares denuncian os bandazos do goberno local, que primeiro ameaza con sancións á veciñanza e logo pide esperar por unhas axudas europeas xa denegadas días antes, xerando unha enorme confusión entre a cidadanía e profesionais do sector.
• Un recente informe do Servizo de Augas confirmaba o colapso que teñen, con falta de persoal, atraso na xestión de centos de contadores certificando que: “a modernización do servizo nunca foi unha prioridade para socialistas e nacionalistas nin no urbano, nin no rural e que só se acordan del para subir os recibos aos lucenses”
• Os populares alertan que o ciclo da auga vai a peor: contratos clave da xestión levan 14 anos caducados e seguen a pagarse con reparos de legalidade por preto de 300.000 € mensuais, sen que o goberno local presente unha alternativa. Ademais, continúan malgastando cartos públicos en proxectos inútiles, como o sistema de reutilización de auga depurada instalado no 2011 e nunca posto en funcionamento. Toda esta situación é responsabilidade directa do alcalde Miguel Fernández, coa complicidade e o aplauso do BNG.
O Grupo Municipal do Partido Popular vén de solicitar a convocatoria dun pleno extraordinario de carácter urxente “para que o goberno local aclare de forma inmediata que tipo de contador de auga deben instalar ou se procede verificalo para dar cumprimento á normativa estatal (Orde ICT/155/2020 que regula del Control Metrolóxico del Estado de determinados instrumentos de medida) antes do 24 de outubro de 2025.
Desde o PP lembran que os contadores con máis de 12 anos deben ser substituídos antes desa data e critican que, desde 2020, xa se podía iniciar este proceso: “Non o fixeron porque nunca tiveron vontade de modernizar o servizo, só se apuraron para subir impostos, pero sen mellorar a calidade do servizo”, subliñan.
Bandazos e enganos á cidadanía
O PP denuncia que o Goberno local de PSOE e BNG actuou con absoluta irresponsabilidade:
• Primeiro, enviaron cartas a varios usuarios advertindo de posibles sancións se non se cambiaban os contadores.
• Máis tarde, o 10 de agosto, publicaron un comunicado recomendando agardar á resolución dos fondos europeos PERTE para decidir sobre o cambio de dispositivos.
• A realidade é que esa resolución xa estaba asinada o día 6 de agosto e denegaba as axudas, polo que o Concello mentiu á cidadanía e aos profesionais do sector.
“Agora a xente non sabe que facer e o Concello, lonxe de aclarar e de liderar esta cuestión, enrreda máis”, indican.
*Un servizo colapsado, segundo a propia Xefa do Servizo de Augas*
O PP tamén puxo o foco nun informe interno da Xefa de Servizo de Augas, que confirma o colapso do departamento encargado de xestionar as altas, baixas e incidencias dos contadores:
• Hai cinco prazas vacantes desde hai máis dun ano e medio, sen cubrir.
• Hai máis de 600 solicitudes pendentes de altas, baixas e bonificacións, 100 comunicacións de cambios de contador sen tramitar, e máis de 200 lecturas sen rexistrar.
• A propia Xefa de Servizo está a tramitar as incidencias dos contadores parados ou con máis de 12 anos, o que incumpre a normativa estatal.
• A situación afecta tamén á facturación municipal, coas liquidacións pendentes desde 2023, e provoca queixas de usuarios por devolucións de fianzas non tramitadas.
• A desorganización é tal que o Concello nin sequera está informando a Augas de Galicia das perdas de auga, o que pode derivar en sancións se se supera o 20% de perda na rede.
O ciclo da auga nunca estivo tan mal
Ante esta situación límite, a voceira do Grupo Municipal Elena Candia e a concelleira Silvia Colmenero insistiron en que hai que poñer en marcha un Plan Integral de Mellora da Xestión do Ciclo da Auga, que inclúa as seguintes medidas:
Decidir que modelos homologados de contadores de auga potable deben instalarse en Lugo e paralelamente:
• Licitación urxente dos contratos de xestión das ETAP e EDAR, caducados desde hai 14 anos, e que seguen sendo pagados con reparos de legalidade.
• Reforzo inmediato do persoal municipal, tanto na brigada de augas como no servizo administrativo e na lectura de contadores.
• Servizo de reparación de avarías 24/7, para evitar que os veciños se queden sen subministro durante días.
• Plan de control e reparación de fugas, reducindo o desperdicio de auga potabilizada.
• Renovación das tubaxes de fibrocemento, priorizando as zonas máis deterioradas.
• Abastecemento e saneamento para o rural, garantindo acceso a auga potable en todas as parroquias.
• Servizo municipal de limpeza de fosas sépticas nas zonas que carecen de saneamento.
• Activación do sistema de reutilización de auga depurada, instalado en 2011 e nunca posto en funcionamento, para usos industriais, rego e baldeos.
