Un ascensor panorámico e unha pasarela mecánica cubrirán os 28 metros de desnivel entre a nova estación e a Muralla, cun percorrido accesible, cómodo e ben integrado no espazo urbano.
A voceira do Grupo Municipal Popular Elena Candia presentou hoxe unha proposta alternativa, viable e moderna para comunicar o barrio da estación co centro de Lugo e salvar os 28 metros de altura e os 400 metros de distancia que separan a nova estación intermodal da muralla. Trátase dunha proposta pensada para as persoas, que aposta por un urbanismo útil, inclusivo e sen improvisacións.
A intervención combina dous elementos que garanten unha conexión funcional e accesible:
1. Un elevador panorámico, con capacidade para 12 persoas, situado nunha parcela entre os edificios das rúas Alta e Miguel de Cervantes, nas proximidades dunha das saídas da nova estación. Permitirá salvar un primeiro desnivel de 8 metros e facilitar o acceso desde a zona baixa da intermodal cara o centro.
2. Unha pasarela mecánica cuberta, estruturada en cinco tramos de aproximadamente 32 metros cada un, que discorrería paralela á fachada dereita do edificio multiusos da Xunta. En total, o percorrido terá unha lonxitude de 175 metros cunha pendente do 12% ou lixeiramente superior, cumprindo cos criterios de accesibilidade universal.
Este sistema permitirá conectar de forma directa a Rúa Alta con Miguel de Cervantes e coa Ronda da Muralla, resolvendo o desnivel de maneira cómoda e eficiente para toda a cidadanía.
O orzamento estimado para esta actuación ascende a 3,5 millóns de euros, e inclúe tanto a obtención do terreo como a execución completa da obra. Para a súa realización sería necesaria a expropiación de pequenas superficies situadas nas rúas Alta, Miguel de Cervantes, Ronda da Muralla e Castelao, pertencentes a cinco titulares, entre eles a propia administración autonómica.
O vicevoceiro popular, Ramón Carbarcos, foi o encargado de explicar os detalles técnicos do proxecto mentres que a voceira popular, Elena Candia cualificaba esta solución como “un reflexo do modelo do urbanismo que queremos para Lugo: útil e centrado nas persoas”. Con esta intervención, poñemos sobre a mesa unha solución seria, transformadora que permitiría integrar de forma efectiva a nova estación co centro histórico e comercial da cidade, mellorando así a mobilidade e a calidade de vida da veciñanza dos barrios da Estación, Sagrado Corazón e Paradai.
Os populares tamén explicaron que esta actuación podería financiarse a través dos fondos europeos da Estratexia EDUSI-Lugo. Dentro dos 20 millóns aos que opta a cidade para proxectos de rexeneración urbana, existe unha partida específica de 5,2 millóns de euros destinada a actuacións de accesibilidade, polo que esta proposta encaixa perfectamente nos criterios establecidos.
