A iniciativa dos populares busca dar resposta ás necesidades
que a veciñanza leva anos reclamando: espazos de uso
público e servizos básicos no barrio
Os populares levaran ao pleno de xuño outras dúas iniciativas
que poñen de relevo a desatención e deterioro de servizos
básicos nos barrios de Lugo, como son os parques e os
centros sociais municipais e se reclama apoio da corporación
para que Lugo teña unhas infraestruturas dignas
O Grupo Municipal do Partido Popular levará ao pleno
unha iniciativa para que o goberno local execute o acordo
aprobado por unanimidade en marzo de 2023, a iniciativa do PP,
para mellorar os servizos do barrio do Castiñeiro.
Naquel momento, todos os grupos acordaron iniciar os estudos
necesarios para atender as demandas trasladadas polos veciños e
veciñas deste barrio. Dous anos despois, e unha vez formalizada
a permuta da parcela na que inicialmente estaban previstas
vivendas de protección oficial —xusto o pasado mes de febreiro—,
xa non hai escusas para continuar adiando a posta en marcha
dun proxecto necesario e viable.
A proposta do Grupo Popular contempla a construción espazo de
uso público na parcela situada na rúa Lorenzo Varela esquina
con Ramón Piñeiro, que con instalacións axeitadas para diferentes
franxas de idade e necesidades da veciñanza.
“Queremos que este novo espazo sirva como zona común para os
que residen no Castiñeiro, un lugar con actividades dirixidas á xente
maior, servizos asistenciais, espazos culturais que apoien aos
artistas locais e iniciativas de carácter social que respondan á
realidade do barrio”.
O PP entende que a falta de servizos neste barrio é unha realidade
que non se pode seguir ignorando, e que o goberno local debe
cumprir os compromisos adquiridos no pleno, que ademais
contaron co apoio unánime da Corporación.
O Grupo Municipal Popular tamén levará ao pleno outras dúas
iniciativas que poñen de relevo a desatención e deterioro de
servizos básicos nos barrios de Lugo, como son os parques e os
centros sociais municipais.
Desde o PP denuncian que o goberno local de PSOE e BNG segue
sen rumbo, sen xestión e sen planificación, como demostra a
apertura da temporada de verán con espazos públicos en mal
estado, nos parques infantís, o a deixadez en reparar desperfectos
nos centros sociais.
Parques infantís sen contrato e sen mantemento
Os populares lembran que o contrato de mantemento dos parques
infantís leva caducado desde decembro de 2022. A isto engádese
a nula coordinación cos operarios municipais da brigada de
xardíns, o que está a provocar o deterioro de moitas destas áreas
verdes.
“Chega o verán e, en vez de atoparnos con parques preparados
para o lecer das familias, o que temos son espazos con
deficiencias, falta de seguridade e abandono”, sinalan desde o
grupo popular.
Centros sociais deteriorados e sen reparacións
A terceira proposición céntrase na situación dos centros sociais,
socioculturais e de convivencia, moitos deles con problemas
estruturais ou de mantemento: goteiras, filtracións, sistemas de
calefacción avariados ou escaleiras de emerxencia inutilizadas.
“A deixadez é total. Non se trata de grandes investimentos, senón
de vontade política. O Concello leva anos deixando deteriorar estas
instalacións básicas sen facer nada”, denuncian.
“É necesario un cambio de rumbo. Lugo precisa dun Concello que
planifique, coide os servizos e estea á altura das necesidades dos
barrios”, conclúen.
A cuarta iniciativa do Grupo Popular busca esixir ao Goberno de
España unha conexión ferroviaria para Lugo en igualdade de
condicións que o resto das capitais da contorna. O PP
considera que Lugo non pode seguir sendo tratada como unha provincia de segunda, e que a discriminación ferroviaria que sofre é
inadmisible.
“Queremos o mesmo trato que teñen outras provincias. Non é unha
esixencia política, é unha cuestión de dignidade e de igualdade para
Lugo”, sinalan.
