O Grupo Municipal do Partido Popular rexistrou unha petición para que o Concello de Lugo axilice a tramitación das autorizacións correspondentes que precisan as asociacións veciñais para executar obras de mellora nos seus locais sociais.
Os populares trasladan a preocupación de varias entidades, que contan con axudas doutras administracións pero teñen que cumprir prazos para non perder as subvencións.
A dilación indebida ou inxustificada na tramitación das autorizacións municipais podería supoñer a perda destas axudas e, polo tanto, poñer en risco actuacións moi necesarias para a mellora dos citados locais sociais, que constitúen espazos fundamentais de convivencia e participación cidadá.
Por todo o anterior, SOLICITAMOS que dende o Goberno Municipal se adopten as medidas oportunas para axilizar a tramitación e resolución das autorizacións precisas, co obxecto de favorecer que as entidades veciñais poidan executar en prazo as melloras previstas nos seus locais sociais e que se dea traslado ás concellerías competentes para os efectos oportunos, instando a unha tramitación preferente destes expedientes mentres estean vinculados á obtención e xustificación de subvencións doutras administracións.
