Mar Carballas: “o edificio inaugurouse para a foto hai un ano, dixeron que era un proxecto vangardista que revitalizaría o Carme e hoxe é un símbolo do despilfarro xunto o Impulso Verde, as Caldas ou o carril bici”
Mañá venres se cumpre un ano da inauguración do chamado “coliving de artistas” do Carme. O goberno local anunciou que este proxecto sería un motor de dinamización cultural e social. Un ano despois, a realidade é ben distinta: portas pechadas, ausencia total de actividade e un edificio baleiro que acumula telarañas e promesas incumpridas.
Desde o Grupo Municipal Popular denunciamos que este proxecto é outro máis do goberno local que simboliza o despilfarro do bipartito. En total, os lucenses pagamos para a foto da inauguración máis de 1,6 millóns de euros (1.059.221 € en expropiacións e máis de 600.000 € en rehabilitación e posta en marcha).
“É indignante. Mentres os veciños reciben os recibos do IBI con subas notables, comprobamos como se malgastan os seus cartos en proxectos sen planificación, sen xestión e sen futuro. Este é o modelo do PSOE e o BNG: máis impostos para pagar os seus derroches”.
No vindeiro pleno municipal, o Grupo Popular solicitará explicacións concretas sobre a programación do coliving. A edil popular Mar Carballas explica: queremos saber que ten pensado facer o goberno local con este edificio e ata cando vai seguir sen uso deteriorándose.
