- Os populares puxeron o foco nas reiteradas cancelacións das actividades extraescolares, como as dúas anuladas esta mesma tarde no CEIP de Paradai, que evidencian un problema estrutural e supón problemas de conciliación das familias lucenses
O goberno local de Lugo está a fallar nun dos piares básicos dun goberno que se autoproclama progresista: a conciliación das familias, permitindo que as actividades extraescolares funcionen con improvisación, cancelacións constantes e falta de garantías.
A última mostra desta caótica situación que se leva vivindo dende finais de 2025 produciuse onte no CEIP de Paradai, onde a empresa contratada polo concello cancelou dúas actividades que tiñan que celebrarse esta mesma tarde por falta de persoal deixando ás familias sen servizo e sen marxe de reacción.
Os populares advirten de que a propia empresa concesionaria recoñece problemas estruturais para cubrir baixas e garantir o monitorado necesario, unha situación que o Goberno local coñece e tolera, sen reforzar os mecanismos de control nin esixir solucións efectivas.
Ata o momento, lembran, a reacción do Concello limitouse a iniciar un procedemento sancionador por presuntos impagos salariais á plantilla, pero sen dar explicacións públicas nin adoptar medidas para asegurar a prestación continua do servizo nin para protexer ás familias afectadas.
O PP lembra que foi grazas ás queixas trasladadas desde o colexio das Gándaras cando se puxo o foco nesta problemática, o que levou ao rexistro dunha batería de preguntas para aclarar desde cando coñecía o Goberno municipal estas incidencias, que controis aplicou e se se pagaron servizos que non se prestaron con normalidade.
Neste contexto, o Grupo Popular anuncia que seguirá recompilando incidencias trasladadas por familias e centros educativos para documentar unha situación que evidencia a distancia entre o relato progresista do Goberno e a realidade que viven os lucenses.
“O PP ten claro o seu modelo: as persoas no centro e a conciliación como prioridade. En Lugo, hoxe, temos un Goberno que fala de políticas sociais mentres deixa ás familias sen servizos básicos”, conclúen.
