O Grupo Municipal do Partido Popular celebrou unha reunión coa Asociación Profesional de Fontaneiros de Lugo (Alufonca) para avaliar a situación xerada polo proceso de substitución dos contadores de auga
• O goberno local recomendou agardar polos fondos europeos cando xa sabía que lle foran denegados, evidenciando cero credibilidade e rigor.
Na reunión celebrada onte entre a voceira do PP, Elena Candia, e a concelleira Silvia Colmenero cunha representación da Asociación Profesional de Fontaneiros de Lugo “transmitíronnos a súa inquedanza ante unhas instrucións contraditorias por parte do Concello de Lugo relativas ao cambio de contadores”.
Os populares lembran como primeiro, algúns veciños recibiron comunicacións ameazando con multas se non cambiaban os seus contadores; despois, o executivo local asegurou que había que esperar á resolución dos fondos europeos do PERTE da auga, comprometéndose a que non se sancionaría.
A día de hoxe, nin os veciños nin os profesionais teñen unha resposta clara sobre que dispositivo deben instalar, xa que o Concello non validou ningún modelo.
2 meses de prazo para cumprir a normativa estatal
Hai que lembrar que a normativa estatal (Orde ICT/155/2020) obriga á substitución de todos os contadores con máis de 12 anos de antigüidade. O prazo comezou en 2020 e remata o 24 de outubro de 2025. Ademais, esta normativa abre a porta a que as cidades aproveiten as vantaxes da lectura remota dos consumos, unha oportunidade que Lugo está a perder pola inacción municipal.
Os populares subliñan que a situación é aínda máis preocupante nas obras novas, xa que a elas tamén lles afecta esta falta de concreción por parte do Concello. Deixan aos fontaneiros aos pés dos cabalos, sen información oficial, e cunha cidadanía desconcertada”, lamentan.
Engano á cidadanía e falta de palabra
O PP considera de extrema gravidade o comportamento do goberno local neste asunto.
• O 10 de agosto, o Concello publicou un comunicado na súa páxina web recomendando agardar á resolución dos fondos europeos do PERTE da auga para decidir o cambio dos contadores.
• Con todo, catro días antes (6 de agosto de 2025) xa estaba asinada a resolución que resolve a terceira convocatoria destas axudas europeas na que se confirmaba que “se desestimaba por falta de crédito”.
“Se houbo engano é grave, pero se non se enteraron, ademais de grave e preocupante”. En ambos casos queda en evidencia a falta de xestión, palabra e credibilidade dun goberno local incapaz de dar respostas claras a dous meses de que remate o prazo da normativa estatal”.
Cero planificación
A pouco máis de dous meses de que finalice o prazo para verificar ou substituír os contadores con máis de 12 anos, en Lugo non hai certezas, nin instrucións, nin planificación. “Estamos diante dun novo exemplo da deixadez deste goberno, que nin organiza, nin resolve, nin dá seguridade nin aos veciños nin aos profesionais”.
Outras demandas
Na reunión con Alufonca, os populares tamén recolleron a demanda de estudar, a nivel autonómico, a recuperación dun carné profesional para fontaneiros —unha acreditación que xa existira no pasado—, co obxectivo de favorecer o recoñecemento e a dignificación da súa profesión, ademáis de que se rexistren obrigatoriamente as instalacións de fontanería
