O voceiro do Grupo Municipal do PP Antonio Ameijide afirmou que o goberno local formalizou o contrato do alumeado de Nadal o pasado 4 de decembro, un contrato no que “chama a atención” que se marca como data de inicio do alumeado o 30 de novembro, o que redundará en que os lucenses so poidan disfrutar das luces festivas, como moito, durante 20 días, o 54% do tempo contratado
O voceiro do Grupo Municipal do Partido Popular no Concello de Lugo, Antonio Ameijide, anunciou que Lara Méndez pagará este ano 139.000€ polas luces do alumeado de Nadal, unhas luces que so se acenderán a metade dos días fixados no contrato.
Antonio Ameijide explica que “a nefasta” planificación de Lara Méndez en todo o que rodea a súa xestión a levou a que non se “acordase” das luces de Nadal ata o 2 de novembro, data na que se asinan os pliegos para a contratación do alumeado de Nadal. “Comezando nese prazo está claro que os atrasos tiñan que aparecer, simplemente polos prazos marcados na lei de contratos”, dixo o popular.
O 5 de novembro se anunciou a contratación e, como os prazos son claros, ata o 22 de novembro non se puideron abrir as ofertas, candos e adxudicou á única empresa que se presentou e non formalizaron o contrato ata o 4 de decembro. “Chama a atención que no pliego marquen como data de inicio unha data que non podían cumprir (do 30 de novembro ao 6 de xaneiro)”, explicou o popular, que engadiu que “ademais de aprobar un pliego que non podían cumprir, van a pagar 139.000€ a una empresa cando so vai a prestar o 54% do servizo contratado”.
Neste senso, o popular agarda que Lara Méndez acenda o alumeado o antes posible e que a rexedora non teña a ousadía de organizar ningún acto de propaganda socialista co acendido das luces de Nadal, xa que “tralo fracaso deste ano o que non tería que facer é sacar peito”.
Doutra banda, Antonio Ameijide anunciou que “esixirán” ao goberno de Lara Méndez toda a información relacionada coa contratación do alumeado de Nadal, xa que “pode darse a circunstancia de que os socialistas se vexan na obriga de acender a iluminación sen ter montados todas as luminarias da cidade”.
Para o voceiro popular queda de novo á vista de todos os lucenses “a improvisación” do goberno de Lara Méndez e o seu desprezo ao comercio local. O seu “deixamento” está a provocarlle un dano irreparable ao comercio local que esta fin de semana “perderá” a oportunidade de captar turistas e tamén aos compradores de Lugo que quizais opten por ir a outras cidades que si que fixeron os deberes e colocaron o alumeado de Nadal.
Para o Grupo Popular as présas que agora ten o goberno de Lara Méndez son outro dos parches deste equipo de goberno que se “despreocupou” do alumeado de Nadal mentres a súa compañeira Carmen Basadre se adicou a presentar o díptico “Ponte en Lugo” no que enumeraban actividades a realizar esta ponte na cidade, actividades que “para nada estarán lucidas polo alumeado de Nadal”.
Antonio Ameijide denuncia que a “descoordinación” do goberno socialista os leva a que Lugo sexa unha das cidades españolas que menos días teña de alumeado de Nadal, xa que “sendo optimistas serán 20 días”, algo que propiciará que “o lucense sexa o galego que máis vai pagar por día polas luces ornamentais do Nadal”.
