O Grupo Municipal do Partido Popular denuncia a inacción e a irresponsabilidade do goberno local de PSOE e BNG no mantemento dos centros educativos públicos de Lugo. A súa deixadez provocou situacións tan graves como o derrube parcial da cuberta do CEIP As Mercedes, onde tivo que ser a Xunta de Galicia quen actuase de maneira inmediata para substituír 700 metros cadrados de cuberta antes do inicio do vindeiro curso.
Pero o caso da EEI Fingoi II é, para o PP, un exemplo paradigmático do bloqueo político que PSOE e BNG están a exercer sobre un servizo esencial como é o comedor escolar. A pesar de que o centro é de titularidade municipal, o Concello pretende agora que sexa a Xunta quen redacte o proxecto e execute a obra dun comedor definitivo. Con todo, esa obra require tempo e non resolve a necesidade inmediata das familias.
A Xunta non se opón á colaboración, pero propón unha solución inmediata: a instalación dunha aula portátil que funcione como comedor desde o mes de setembro. Para iso, só é necesario que o Concello ceda a parcela para poder instalar esa aula. Pero, a día de hoxe, o goberno local segue sen formalizar esa cesión, bloqueando a solución que podería estar lista en poucas semanas.
O Partido Popular advirte que o goberno de PSOE e BNG está alargando os prazos deliberadamente por rédito político, poñendo en risco a posta en marcha dun servizo esencial para as familias. Mentres botan balóns fóra, impiden unha solución rápida e deixan sen resposta unha demanda urxente de conciliación.
«É un escándalo. O Concello leva anos sen actuar, e cando a Xunta propón unha solución viable e rápida, seguen poñendo paus nas rodas. Mentres PSOE e BNG bloquean a colaboración institucional por intereses políticos, as familias seguen sen comedor escolar. Están xogando coa conciliación e co benestar do alumnado», denuncian os populares.
Desde o PP lembran que a falta de mantemento nos centros públicos non é nova: moitas actuacións, como limpeza de arquetas, arranxo de instalacións, accesibilidade ou reforzo de persoal, levan anos pendentes a pesar das peticións dos equipos directivos. «É unha constante: o Concello nin mantén os centros nin permite que se melloren», afirman.
O Grupo Popular esixe ao goberno local que asuma as súas responsabilidades, actúe con axilidade e deixe de entorpecer as solucións doutras administracións.
