Sábado 30 de agosto de 2025.- Nas reunións de escoita activa que a voceira do Partido Popular, Elena Candia, xunto cos concelleiros do Grupo Municipal realizan na zona rural sempre afloran problemas relacionados co abandono por parte do goberno local desta zona.
O caso da escola de Labio é a testemuña máis gráfica dunha obra inacabada e de cartos perdidos polo desinterese de PSOE e BNG co patrimonio das parroquias. Os veciños levan 15 anos esperando que o Concello remate a rehabilitación da escola que el mesmo empezou.
As obras foron realizadas a través dun obradoiro de emprego promovido polo Concello de Lugo no ano 2009, subvencionado con fondos do Fondo Social Europeo, cun investimento superior ao medio millón de euros, destinados á rehabilitación de dúas escolas sendo unha delas a da Airexe (Labio).
No caso de Labio, o proxecto contemplaba a rehabilitación integral da antiga escola. Derrubouse a planta alta e nunca se lle repuxo o teito, quedando o edificio exposto ás inclemencias desde 2010.
Durante a intervención neste edificio incluído no Catálogo de Elementos retiráronse tamén as ventás orixinais, de valor arquitectónico e patrimonial, e das que nunca máis se tivo noticia. O edificio presenta un estado de abandono absoluto, impropio dun ben catalogado, e sen ningún uso nin protección.
Cando rematou o obradoiro, o Concello tiña a responsabilidade de finalizar os traballos pero non o fixo e nin socialistas nin nacionalistas, preocupáronse por rematar esta obra.
