O Centro de Interpretación da Muralla, primeira parada para moitos
visitantes, pecha a serie de 5 vídeos do PP sobre as salas museísticas
Pechamos a serie de vídeos sobre o
estado das salas municipais cun chequeo ao Centro de Interpretación da
Muralla, situado na Praza do Campo.
Este espazo, que alberga tamén na súa planta baixa a Oficina Municipal
de Turismo, representa a primeira toma de contacto coa cidade para
moitos visitantes. Con todo, atópase nun estado de abandono total, igual
que outras salas baixo responsabilidade da área de Cultura que dirixe o
BNG.
O concelleiro popular Agustín Gallego critica que “resulta inconcibible que
o lugar onde moitos turistas comezan a súa experiencia en Lugo estea
nun estado tan lamentable”
Entre os problemas detectados no Centro de Interpretación da Muralla,
destacan:
• Pantallas táctiles levan anos fóra de servizo
• Os vídeo informativos tampoco funcionan
• A climatización sen funcionar desde xuño de 2023 por falta das
tarxetas de control.
• O sistema contra incendios está inoperativo desde outubro de 2020, e
as luces de emerxencia non funcionan desde o 2 de maio de 2024.
• Fallos reiterados na ventilación, documentados desde 2020, con
queixas por malos cheiros.
• Baldosas soltas con risco de caída, detectadas en novembro de 2024.
• Equipamento informático que falla, con sistemas que fan ruído ou
precisan arranque manual.
• Códigos QR danados ou desactualizados e cobertura wifi insuficiente
na planta baixa.
Desde o PP reclaman un plan de intervención integral e urxente para
garantir o mantemento dun espazo que debería ser referente da calidade
turística e patrimonial da cidade.
“Un goberno serio non permite que a imaxe do noso principal ben
patrimonial se vexa lastrada por este abandono. Isto non é só unha falta
de coidado, é unha falta de respecto á historia de Lugo e a quen nos
visita”.
