“Tanto Elena Candia como o conselleiro de Educación coincidiron en que escoitar ás ANPAs e oturos representantes da comunidade educativa e propoñer solucións concretas é a base dunha política útil, próxima e responsable.”
No marco do traballo de escoita activa que está a desenvolver o Partido Popular de Lugo, a voceira municipal Elena Candia mantivo nos últimos días un encontro con representantes da comunidade educativa da cidade, ao que tamén asistiu o conselleiro de Educación, Ciencia, Universidades e Formación Profesional, Román Rodríguez.
A reunión tiña como obxectivo recoller demandas e preocupacións das familias e profesionais do ensino, e buscar respostas concretas. Como resultado, avaliáronse unha batería de liñas de traballo firmes por parte da Xunta de Galicia, orientadas a mellorar a atención educativa, especialmente no que respecta ao avance cara a un sistema cada vez máis inclusivo, adaptado ás necesidades do alumnado lucense.
Entre as futuras medidas comentadas, atópase o apoio ás actividades organizadas polas anpas ou a avaliación da falta de comedor na EEI Fingoi 2, unha demanda reiterada das familias que a Xunta analizará en colaboración co Concello*
Outro dos ámbitos de diálogo que máis interese suscitou foi o relativo ao programa E-Dixgal de libro electrónico, que a Xunta se comprometeu a revisar para afondar nun modelo híbrido que combine papel e tecnoloxía.
Tamén coincidiron na necesidade dos programas de apoio aos estudantes estranxeiros ou na implantación do expediente dixital do alumnado e a redución da carga administrativa nos centros, facilitando así o labor docente.
Neste encontro participaron tamén a directora xeral de Ordenación e Innovación Educativa, Judith Fernández, representantes de anpas, centros públicos e concertados, colectivos de necesidades educativas especiais, altas capacidades e entidades sociais vencelladas á inclusión.
Elena Candia valorou moi positivamente o ton da reunión e destacou que “o diálogo directo coa comunidade educativa é esencial para seguir construíndo un sistema centrado no alumnado e adaptado ás realidades locais”.
