Facémonos eco das reivindicacións da veciñanza da rúa Paulo Fabio Máximo centradas en mellorar a limpeza, a accesibilidade e a seguridade viaria nunha zona con moita densidade de tráfico e que comunica dúas das principais arterias da cidade: a Avenida da Coruña e a Avenida Infanta Elena.
Unha das principais preocupacións é a falta de prazas de aparcamento, especialmente cando coinciden co estacionamento dos vehículos dos feirantes, que ocupan a zona tanto durante o San Froilán como noutras datas do ano nas que se celebran festexos. “Os residentes ven reducidas as súas posibilidades de aparcar durante semanas, sen que o Concello lles dea alternativas”.
O PP tamén pide reforzar a limpeza das beirarrúas, zonas verdes e parques infantís, que presentan acumulación de maleza e falta de mantemento, así como limpar os sumidoiros tupidos para evitar problemas de inundacións. A veciñanza demanda ademais reubicar os colectores de lixo e reparar os rebaixes das beirarrúas, que están moi deteriorados e dificultan o paso de persoas con mobilidade reducida.
En materia de seguridade viaria, os populares reclaman o remate da beirarrúa que quedou inacabada no lado dos edificios e a sinalización clara da preferencia na incorporación á rotonda de Infanta Elena, un punto especialmente conflitivo, así como a reparación dunha tapa de alcantarillado na calzada que presenta perigo,
Finalmente, o Grupo Popular solicita reforzar as liñas de autobús L3 e L4 nos días de maior afluencia ao Banco de Alimentos, servizo ao que acoden moitos usuarios e voluntarios, “porque o transporte público tamén debe adaptarse ás necesidades reais da xente”.
