O Grupo Municipal do Partido Popular preguntará no próximo Pleno se o Concello de Lugo está preparado tecnicamente para a lectura remota de contadores de auga intelixentes e se conta xa cunha plataforma dixital que permita recibir e procesar os datos de consumo dos fogares lucenses.
A concelleira Silvia Colmenero lembra que PSOE e BNG levan 25 anos gobernando Lugo e a única novidade no servizo da auga foi subir o recibo este ano. Mentres tanto:
• Os principais contratos do ciclo da auga están caducados desde hai 14 anos.
• A brigada municipal, que debería garantir o mantemento, está desmantelada.
• As fugas e avarías tardan días en repararse, incluso deixando barrios sen auga.
• A zona rural segue sen abastecemento nin saneamento,
• E o sistema de reutilización de auga leva 14 anos sen empregarse.
Colmenero denuncia que agora, a poucos meses de que a normativa estatal obrigue á substitución de todos os contadores con máis de 12 anos de antigüidade (Orde ICT/155/2020), o goberno local segue sen dar unha resposta clara sobre se Lugo está preparado para aproveitar as vantaxes da lectura remota de consumos. Hai que lembrar que o prazo para cambiar estes dispositivos empezou en 2020 e finalizará en outubro de 2025
A concelleira popular lembra que Lugo arrastra problemas crónicos neste servizo: lecturas acumuladas, facturación por estimación, numerosas reclamacións veciñais e un sistema que xera incerteza e prexuízos económicos para os usuarios. A popular explica que a implantación dun sistema de telexestión de contadores permitiría a lectura dos datos de consumo de auga de forma remota, sen necesidade de intervención manual, a través de contadores intelixentes que se comunican cun sistema central, reducindo as queixas e facilitando a xestión do servizo.
Dende o Grupo Popular lembran que siguen agardando a que se lles facilite información sobre cantos contadores hai pendentes de substituír en Lugo e cantos son de titularidade municipal.
Para Colmenero “é incomprensible que nun contexto no que o Goberno local vén de subir os impostos municipais, incluído o recibo da auga, os lucenses sigan sufrindo un servizo con graves deficiencias e sen mellora ningunha”.
