- O programa publicarase na canle de YouTube de Elena Candia e nas redes sociais da portavoz popular, co obxectivo de achegar á veciñanza as historias persoais que hai detrás de lucenses coñecidos e recoñecidos de diferentes ámbitos
- O primeiro capítulo, protagonizado por Paco e Héctor do Restaurante España, mostra como os proxectos familiares coidan o produto local, respectan a tradición e manteñen calidade, sendo este establecemento o máis antiguo de Lugo que leva preparando pratos dende o ano 1907
- En “Canda Elena” descubriremos historias como esta que mostran o esforzo, a paixón e a identidade que fan única a gastronomía lucense
A voceira municipal do Partido Popular de Lugo, Elena Candia, achegará aos lucenses o lado máis descoñecido de diferentes protagonistas da vida social, cultural, deportiva e empresarial da cidade a través dun novo formato audiovisual de entrevistas biográficas titulado “Canda Elena”.
O proxecto nace como un espazo, cunha periodicidade quincenal, de encontro distendido con protagonistas da vida lucense procedentes de ámbitos moi diversos, que compartirán as súas vivencias, as súas traxectorias profesionais e tamén a súa visión sobre a cidade.
A través deste formato, Elena Candia busca poñer en valor o talento, o esforzo e as historias persoais de moitos lucenses que forman parte do tecido social da cidade, ofrecendo unha mirada máis próxima ás persoas que contribúen a construír Lugo cada día.
“Canda Elena” é un programa de conversa no que a propia Candia exerce como anfitrioa, creando un ambiente próximo que facilita coñecer non só a traxectoria pública das persoas convidadas, senón tamén a súa experiencia vital.
O primeiro capítulo do programa, que xa está dispoñible, e está protagonizado por Paco e Héctor, do Restaurante España, un exemplo de cómo tradición, emprendemento familiar e coidado do produto local se combinan para ofrecer calidade dos productos de proximidade desde a orixe.
Esta historia non é só de cociña: é unha lección de esforzo, de compromiso coa identidade local que nos lembra que cada prato servido en Lugo é tamén unha celebración da nosa cultura, dos nosos produtos e da creatividade das familias que manteñen viva a gastronomía da cidade.
