Reclamamos ao concello de Lugo que planifique e busque financiamento
O Partido Popular considera unha boa noticia para Lugo a ampliación do prazo legal para o cambio de contadores de auga, que pasa de 5 a 7 anos segundo a nova redacción da Orde ICT/155/2020, do 7 de febreiro, publicada no BOE do venres.
Esta modificación era necesaria para evitar que Lugo incumprira, xa que o goberno local non avanzou nada neste proceso, a pesar de tratarse dun requisito estatal de control meterolóxico que debía cumprirse este mes.
“Lugo ía chegar tarde pola falta de traballo e de planificación do goberno local”, explicou a concelleira Silvia Colmenero.
Unha nova oportunidade para mellorar o ciclo da auga
Dende o PP lembran que este cambio non debe limitarse a substituír contadores antigos, senón que é unha ocasión para modernizar o sistema e apostar por contadores dixitais, que permitan unha lectura máis eficiente e unha xestión responsable do ciclo da auga.
“Pedímoslle ao goberno que non volva deixar pasar o tempo. Agora teñen dous anos máis para facelo ben: deben modificar a ordenanza fiscal, definir o modelo tecnolóxico e buscar financiamento para garantir un sistema moderno e transparente”, subliñou Colmenero.
Os populares lembran que xa reclamaran nun Pleno extraordinario claridade e planificación respecto a este asunto. Agora, coa ampliación do prazo, o Concello dispón de tempo suficiente para facer as cousas con sentido común e con visión de futuro.
“Non se trata só de cumprir unha norma; trátase de mellorar o servizo, evitar sancións e avanzar cara a unha cidade máis eficiente”, conclúen.
