O PP lamenta que Méndez antepoña o electoralismo ás necesidades dos veciños da Croa para activar a proposta do PP para entregar as escrituras aos veciños

O voceiro do Grupo Municipal do PP Antonio Ameijide afirma que “hai claros tintes electoralistas” xa que despois de que en xuño do ano pasado “puxéramos sobre a mesa” a solución para as vivendas da Croa, non foi ata o mes pasado cando Lara Méndez deu a orde aos técnicos municipais para poñerse a traballar na solución para estas vivendas

O voceiro do Grupo Municipal do Partido Popular no Concello de Lugo, Antonio Ameijide, lamenta que Lara Méndez antepoña os seus intereses persoais aos dos veciños da cidade ao “calcular e xogar” cos tempos electorais para entregar “algo” aos veciños da Croa que levan 20 anos agardando polas escrituras das súas vivendas.

Antonio Ameijide recorda que o pasado mes de xuño “puxemos sobre a mesa” a solución máis áxil para que os veciños da Croa puideran pasar páxina dunha vez. Unha solución que Lara Méndez se negou a escoitar durante meses e, tivo que aceptar, unha vez “a presentamos a todos os voceiros dos grupos municipais” e non foi ata o mes pasado, 9 meses despois, cando Lara Méndez deu a orde aos técnicos municipais de poñerse a traballar na solución para a Croa.

A solución proposta polo Grupo Municipal Popular pasaba porque o equipo de goberno encargue no Concello un proxecto de parcelación da zona onde se atopan as vivendas da Croa e logo, unha vez aprobado no Concello, inscribir as parcelas no rexistro da propiedade para, posteriormente, entregarlle as escrituras aos lexítimos propietarios das vivendas. “O proceso é rápido e sinxelo, o único que fai falta é vontade política”, afirmou o voceiro popular.

Un proceso que podería durar uns 3 meses e que a alcaldesa dilatou ata os tres últimos meses de mandato unicamente pensando en obter réditos electorais. “O único que quere a alcaldesa é entregar algo aos veciños da Croa na procura de votos para tentar, á desesperada, manterse no sillón”, explicou o popular.

As familias afectadas, ao non dispoñer do título de propiedade dos inmobles, non poden hipotecar ditas vivendas, avalar préstamos, e incluso, atopan moitas dificultades á hora de facer o testamento ante notario. Outra cuestión que lles afecta ten que ver coa alta no servizo de abastecemento de auga o que lles obriga a pagar en dous recibos o consumo “o que supón un sobrecusto” porque acumula os gastos en dous pagos, situación que se mantén na actualidade pese ás promesas da alcaldesa para corrixilo. Ademais, como se acumula a lectura de varios meses cambia o tramo de facturación e, nalgún caso, duplícase o importe por m3 de auga. “Se temos en conta que falamos de familias con escasos recursos, queda patente unha falla de sensibilidade por parte do goberno local”, afirmou Ameijide.

O voceiro popular lembrou como os veciños das quince vivendas unifamiliares, situadas no barrio de Albeiros, levan agardando polas escrituras dende que en febreiro do ano 2000 lles entregaron os inmobles. “Era unha das primeiras encomendas que o alcalde do Partido Popular, Joaquín García Díez, deixou pendente en 1999. Os populares lembran que a construción destas vivendas sociais foi aprobada na Xunta de Goberno Local do 17 de decembro de 1997, cun prazo de execución de nove meses e por un importe total de 103.530.141 pesetas.

Responder

1 + twelve =