O voceiro do Grupo Municipal do PP Antonio Ameijide asegura que na comisión de seguimento de acordos plenarios a rexedora confirmou que incumprirá o acordo plenario que a obrigaba a asesorar aos cidadáns afectados por ocupacións ilegais de vivendas xa que alegou que non pensa cumprir ese acordo porque non ten capacidade para indicar aos cidadáns os pasos a seguir para recuperar a súa propiedade
O voceiro do Grupo Municipal do Partido Popular no Concello de Lugo, Antonio Ameijide, denuncia que Lara Méndez segue a posicionarse do lado dos que optan por incumprir a lei antes que do lado dos lucenses que a cumpren, ao asegurar na comisión de seguimento de acordos plenarios que non creará a oficina de asesoramento a lucenses afectados por ocupacións ilegais das súas vivendas, unha iniciativa que o Grupo Popular levou a pleno e que se aprobou cos votos populares, de Lugonovo e Ciudadanos.
Antonio Ameijide recorda que é a terceira ocasión nas últimas semanas en que Lara Méndez prefire posicionarse do lado dos que optan por non cumprir a lei antes que estar ao lado dos que si a cumpren. O voceiro popular explica que a rexedora votou en contra da creación dunha ordenanza de convivencia e contra a creación desta oficina de asesoramento e agora “nos atopamos con esta posición enrocada” da alcaldesa, que se nega a cumprir coa vontade maioritaria do pleno.
Para o popular esta é unha mostra máis de que Lara Méndez non goberna a cidade baixo a súa vontade, senón que segue as pautas marcadas polo voceiro do BNG, Rubén Arroxo, que tamén se puxo en contra da creación desta oficina, polo que a alcaldesa segue os seus ditames para defender “o sillón e o soldo” antes que preocuparse de quen ten que facelo: polos cidadáns.
Antonio Ameijide explica que durante o presente mandato o Grupo Popular levou a pleno 105 iniciativas, das que se aprobaron 94, un número importante de propostas das que Lara Méndez segue a incumprir o 96% delas, xa que unicamente deu cumprimento a 4 propostas.
Do total de iniciativas presentadas polos populares, 22 foron en materia de mobilidade, todas elas aprobadas polo pleno, e, pese a iso, Lara Méndez aínda non deu cumprimento a ningunha delas, o que amosa claramente o seu “nulo interese” por mellorar a mobilidade na cidade.
Entre esas 22 medidas destacan a renovación integral do sistema de transporte público, posta en funcionamento dun sistema de rotación do aparcamento, ordenanza de gorrillas, mellora da seguridade viaria en cruces perigosos da cidade e un plan de protección para os peóns, a creación dun aparcadoiro nas inmediacións do paseo do Miño ou a creación dun plan específico de acceso ao casco histórico.
Ademais, os populares levaron a pleno para o seu debate 10 propostas encamiñadas á mellora das zonas verdes da cidade, como a creación da praia fluvial, a iluminación dos parques do Miño e Ombreiro, mantemento e creación de novos caniles ou a ampliación e mellora do parque periurbano da cidade, medidas todas que se aprobaron e das que Lara Méndez aínda non puxo ningunha en funcionamento.
Por último, Antonio Ameijide tamén fala das 4 medidas en materia de contratos que os populares presentaron ao pleno e que se aprobaron todas pero que a rexedora segue a ignorar. Esas iniciativas aprobadas son a readxudicación de todos os contratos caducados ou a creación dun sistema aberto de adquisición de contratos menores.
