Web del Grupo Municipal del Partido Popular del Ayuntamiento de Lugo

Novas e actualidade

	O Grupo Municipal Popular non acode ao "acto propagandístico" de Orozco e a ministra Espinosa
	06/11/2009

	O Grupo Municipal Popular entende que a asistencia da ministra á firma do convenio en que ela non intervén, é unha estratexia para saír na foto. Os populares ven pouco contido neste acto, que se suma a tantos outros que presuntamente porían en marcha unhas instalacións que seguen sen funcionar.


	O portavoz do Grupo Municipal Popular, Joaquín García Díez, anunciou que o seu grupo non acudiría á convocatoria do Goberno para un acto que os populares consideran "propagandístico". Asinarase un convenio máis na longa lista de documentos e trámites coa que o Goberno Local está intentando buscar continuos titulares. Un exemplo da pouca credibilidade destas noticias é que a ministra acudiu en febreiro a inaugurar as instalacións da planta potabilizadora, que seguen sen bombear nin un metro cúbico á cidade.



	García Díez anuncia que os populares non serán partícipes nin cómplices dunha "política de anuncios e falsas promesas". Na súa anterior visita, a Ministra "inaugurou unha planta que levou tempo e moito diñeiro de todos os cidadáns para mellorar o servizo e a calidade da auga, pero nove meses despois non bombean nin un metro cúbico".

	O que é máis grave, "estase pagando custo elevadísimo a unha empresa para manter unhas instalacións que non están servindo para nada".