Na última comisión de suxestións, que preside a popular Cristina Ares, presentáronse distintos informes sobre reclamacións de veciños pendentes de resolución.

A concelleira popular manifestou a súa satisfacción pola marcha deste organismo "desde a posta en funcionamento desta comisión en setembro de 2007 presentáronse preto de 300 escritos", puntualizou.

Entre as suxestións que o Concello respondeu nesta ocasión está a dun veciño que reclama que os escritos que se lle envíen sexan en castelán. A resposta do gabinete de normalización indica que a actuación do Concello é conforme a dereito e engade "considérase que o exercicio do seu dereito a solicitar expresamente a tradución ao castelán daqueles documentos que lle afecten persoalmente, suponlle prexuízos debido a atrasos na tramitación, pero pode reclamar en cada caso concreto".

Por mor dunha queixa veciñal por deficiencias na calzada das Gándaras infórmase de que se deron instrucións aos operarios para que non se repita a situación denunciada.

Na comisión de suxestións tamén compareceron funcionarios de distintos servizos. O que máis reclamacións pendentes tiña era o de transportes.