Outro aspecto que descoida o Goberno é o da vixilancia. As cámaras que hai non gravan polo que é imposible que haxa un control dos vehículos. Ao longo deste último ano desapareceron 10 unidades, e moitas outras sufriron importantes deterioracións. Desde a súa posta en funcionamento foron roubadas preto dunha vintena das 100 que adquiriu o Concello para posta en marcha do Rebicíclate.

"As probas indican que o goberno local non presta o máis mínimo interese a potenciar o uso da bicicleta. Ratifícanse as nosas denuncias: este servizo naceu para quedar ben de face á galería, sacar a foto e dicir que Lugo ten cinco bases de bicicletas".

Propostas para mellorar o servizo.-

Intensificar a vixilancia. As cámaras de seguridade teñen que estar gravando, na actualidade as imaxes a tempo real pódense visionar en dous monitores que están fóra da sala de control de tráfico co que non hai unha vixilancia durante as 24 horas do día.

Facilitar aos usuarios no momento da retirada do cartón un cadeado.

Establecer rutas seguras para os usuarios.

Máis bases, cun tamaño máis reducido. Por exemplo en proximidades Praza do Rei, ou a zona da Piringalla.

A expedición inmediata do cartón no momento de presentar á solicitude. Cun sistema de préstamo de bicicletas inmediato facilitaríase aos turistas que se achegan á cidade utilizar este servizo.

Na actualidade a tramitación do cartón de Rebicíclate, tarda uns dez días "como mínimo", o que impide ao visitante eventual utilizar o servizo.

Dotar ás bicicletas de préstamo de faros para que se poidan utilizar todo o ano.