O Grupo Municipal do Partido Popular acusa ao Goberno Local de "pechar os ollos" ao buraco económico que xera o servizo do guindastre municipal de Lugo, que desde 2006 supuxo un custo para o Concello de millón e medio de euros. A xuízo dos populares o servizo, co sistema actual, non é rendible. O seu déficit cífrase en aproximadamente 39.000 euros ao mes.

O concelleiro popular Enrique Rozas, que leva denunciando en reiteradas ocasións o descontrol deste servizo, anunciou hoxe en rolda de prensa que levará ao próximo pleno unha iniciativa que poña fin a esta situación. "O máis sensato é que o Concello renegocie coa empresa as condicións da adxudicación axustándose ás necesidades que ten a cidade". Rozas acusa ao Goberno Local de "desentenderse deste problema" e pregunta cales son os motivos desta desidia. Ve neste asunto unha proba máis de que "perder diñeiro pola súa ineficacia non lles doe porque non sae dos seus petos".

Os populares temen que, de continuar con esta dinámica, e dado que a finalización do contrato do servizo do guindastre está prevista para o ano 2015, o buraco económico poida chegar a supor ao Concello a friorenta de 4.300.000 euros.