Por fin o goberno local parece disposto a asumir a proposta que o PP leva facendo nos dous últimos mandatos de Orozco: "o cobro por consumo real de auga".

Os populares anunciaron que estudarán a proposta que hoxe lles trasladou o goberno socialista. "Unha vez máis acaban de demostrarnos que durante estes anos utilizaron escusas sen sentido para evitar abordar esta medida que podería beneficiar a moitos lucenses".

Orozco condicionou esta proposta á constitución da empresa mixta e "pola súa incapacidade para levar ese proxecto adiante, logo de dous anos dándolle voltas, decide abordar este cambio".

A proposta dos populares é eliminar a taxa do consumo mínimo dos recibos de auga e que só se cobre o cidadán o consumo real e se é preciso, establecer un mínimo por mantemento das instalacións.

Esta taxa, na súa actual versión, é un instrumento recadatorio inxusto para a maioría dos lucenses. Na actualidade, un fogar que consuma 3 metros cúbicos de auga ao trimestre paga a mesma cantidade que a familia que consuma 25m3, algo absurdo e contrario a toda lóxica. É un claro atentado contra o principio de igualdade.