O Grupo Municipal do Partido Popular anunciou hoxe que "antes de recorrer a sentenza que anula o plan urbanístico para as costas do parque debe convocarse de forma urxente á comisión de achaiadura para que analice a resolución do xuíz que se acaba de coñecer". Os populares son partidarios de abrir un procedemento negociado co promotor das "torres do parque" para buscar unha solución que reduza o impacto visual destes edificios.

Os populares presentaron en 2005 alegacións ao PERI suxerindo que se desprazase parte da edificación prevista na parte alta da leira cara á Rolda da República Arxentina. O Grupo Popular insistiu "por activa e por pasiva" en apostar por un conxunto aterrazado máis baixo, con bloques separados evitando así a sensación de muralla do actual proxecto. Esta sería unha solución posible e menos agresiva para a contorna.

En canto á parcela de equipamento sociocultural, os populares propuñan que se situase de forma similar á proposta que presentou inicialmente o anterior propietario: ao longo das costas do parque Rosalía.

O PP, que votou en contra desta operación, manifestou en reiteradas ocasións que "o convenio urbanístico aprobado en solitario polo PSOE para as costas do parque é pouco beneficioso para a cidade de Lugo e entendemos que se priman intereses privados sobre públicos". Hai que subliñar que o grupo popular intentou acudirse na causa aberta polos veciños pero por tratarse dun partido político non se aceptou o trámite.