Os populares defenderán no Pleno do luns tres proposicións de distintos temas de actualidade como son o futuro do matadoiro, que se abra á oposición a participación na xestión das obras que se executen no Concello e unha iniciativa para que o Goberno de Madrid reserve nos Orzamentos Xerais do Estado, os fondos necesarios para acometer proxectos que son prioritarios para a cidade.
García Díez aclarou que esta proposta que se presenta a Pleno é "aberta e en positivo". "Agora, que se están elaborando os Orzamentos Xerais do Estado, é o momento de sumar esforzos", puntualizou o portavoz popular "un acordo unánime reforzaría as xestións do alcalde en Madrid".

Polo demais preséntanse dous rogos: un para que se adapte canto antes a aplicación informática no portal municipal para que os cidadáns que fagan pagos de recibos on-line poidan imprimir en casa o xustificante de pago. Os populares pregúntanse "de que serve este servizo de pago on-line se para conseguir o xustificante temos que desprazarnos igualmente"".

O outro rogo é para que se debatan periodicamente, no seo da Comisión de Cultura do concello, os proxectos de publicacións editadas polo Concello así como a adquisición de fondos bibliográficos.