O Grupo Municipal do Partido Popular denuncia un novo caso de "improvisación e mala xestión" da área de protección da comunidade. Enrique Rozas criticou que "polo descoido" do goberno "incongruentemente antes de que acabe o curso municipal de formación de axentes de mobilidade finalizará o prazo para presentar solicitudes para a contratación de quince prazas de axentes de mobilidade para o San Froilán".

O popular explicou que esta situación é froito do atraso do comezo do curso de axentes de mobilidade, que arrinca hoxe ata con dez días de demora. "Farase un gasto de 4.500 euros en formación e preto de 13.000 en contratación dos 15 efectivos".

O edil popular recorda que o responsable de área, o señor Rábade, na presentación deste curso deixou claro que as persoas que participasen nas clases recibirían unha "preparación moi válida" para calquera oposición ou servizos en forzas de seguridade: "Chama a atención que pola súa incompetencia esta preparación non se poida ter en conta na selección dos 15 axentes de mobilidade que estarán operativos no San Froilán, xa que se cubrirán antes de que acabe este curso as 15 prazas para o servizo das patronais".

A chapuza das bases.-

Para o Grupo Popular "o equipo de goberno xustifica cun temor ao boicot o atraso do curso mentres esconde o seu metedura de pata á hora de redactar as bases". Rozas indicou que non figuran os criterios de exclusión nin se contempla se está acoutada a persoas en paro ou con outros condicionantes laborais. O popular recorda que os únicos tres requisitos das bases son: ser maior de idade, ter a ESO e o carné de conducir A e B. Así mesmo especificábase que se tería en conta a orde de inscrición.

Outro exemplo "da chapuza do proceso" é que son distintas as bases do curso que as da contratación dos axentes de mobilidade, a pesar de tratarse dunha mesma figura. Unha das diferenzas é que non se pide o mesmo tipo de carné de conducir.