• Alicia Pena critica que o Goberno Local rexeite sistematicamente as suxestións dos populares e pide que as incorporen ao documento que se viu obrigado a preparar, en xuño, a petición da Xunta.
• Os populares reclaman "axilidade e implicación" do Goberno Local nas súas competencias.

A distinta vara de medir do PSOE.-

A concelleira popular explicou que o seu grupo vénlle ofrecendo ao goberno de Orozco, ano tras ano, ideas para mellorar a ruta do camiño primitivo ao seu paso por Lugo sen que faga nin a máis mínima xestión para levalas a cabo. "A resposta de que non é da súa competencia non deixa de ser curiosa, está claro que agora cambian a vara de medir".

A xuízo de Pena o Goberno Local de Lugo perdeu "un tempo valioso para potenciar esta ruta" recordando como algunhas das súas propostas "eran medidas que custaban pouco e o único que requirían é vontade política".

De competencia municipal é ter en "perfecto estado de revista" a entrada a Lugo do Camiño Primitivo. Os populares propuxeron que se coloque un panel informativo indicando o paso da ruta por Lugo, o teléfono do albergue e outros datos de interese. Os peregrinos quéixanse de que ao final da etapa, logo de desvíos continuos para chegar á cidade, e de subir as escaleiras que comunican a rúa San Eufrasio con Fontiñas, non hai ningún sinal para recibir aos camiñantes.

Outra proposta popular foi situar a caseta que actualmente está abandonada na Praza da Constitución (fronte á estación de autobuses) para ofrecer esta información aos peregrinos.

Tamén se propuxo estudar a creación de zonas de descanso para peregrinos. Pena suxire o acondicionamento do local social abandonado do Burgo.

Por suposto, pediuse infinidade de veces intensificar a limpeza e mantemento de cunetas, marquesiñas e puntos limpos que se atopan ao pé do camiño e que habitualmente presentan un estado lamentable.