O Grupo Municipal Popular, por boca do seu portavoz, Joaquín García Díez, propón que o Concello de Lugo volva expor os leóns orixinais realizados pola factoría de Sargadelos e recentemente restaurados.

O Goberno Local anunciou o pasado mes de abril que en menos de dous meses estarían dispoñibles estas figuras, e que só estaban á espera de ser pintadas. Para García Díez estas pezas, "de interese histórico e coñecidas por todos os lucenses, deberían estar situadas nun lugar en que todos poidamos gozar novamente deles".

Un dos lugares que probablemente se convertan nunha zona emblemática da cidade, é a nova Praza de San Marcos. "Sería unha boa opción que o deseño da Praza fixésese de forma que poida albergar estas pezas".

O problema é o anuncio do Goberno Local de que os leóns deberán estar a cuberto para a súa mellor conservación. O PP afirma que é fácil buscar formas de protexelos, xa sexa con tratamentos especiais como os que se aplican a esculturas nos diversos lugares en que están expostas á intemperie, ou introducindo no concurso de ideas da reforma da Praza un punto que faga referencia a esta problemática, para buscar entre todos solucións idóneas.

Mentres non estea decidido o futuro dos leóns, os populares propón que se trasladen a un lugar onde poidan ser gozados "desde xa" por lucenses e visitantes, podendo facerse unha cesión temporal ao Museo Provincial, ou instalándoos o Concello na sala Porta Miñá, o Museo de San Roque, ou calquera outra localización que se considere oportuna.