Web del Grupo Municipal del Partido Popular del Ayuntamiento de Lugo

	O PP pide un Plan de Reaxuste Orzamentario e a comparecencia da concelleira de Economía
	19/06/2009

	O Grupo Municipal Popular reacciona así ante as preocupantes cifras de ingresos que anunciou hoxe Sonia Méndez, que recoñece que os ingresos por construción caeron un 80%.


	O portavoz do Grupo Municipal Popular, Joaquín García Díez, anunciou hoxe en rolda de prensa que o seu grupo rexistrou esta mesma mañá unha moción de urxencia na que se propón ao Goberno Local a execución dun Plan de Reaxuste Orzamentario. Tamén pediron a comparecencia urxente da concelleira de economía, Sonia Méndez, para que explique por que no pleno celebrado o día 3 de novembro de 2008 (debate dos Orzamentos) dicía que o Goberno Local era moi previsor ao adiantar unha caída do 15% nos ingresos por construción, fronte ao 80% que se está recoñecendo agora. "Non axustaron ben daquela, como lles dixemos antes, durante e tras a aprobación dos Orzamentos". O portavoz popular explicou que "é obvio que se os ingresos do Concello redúcense tan notablemente, haberá que axustar os gastos para non caer nunha espiral de déficit".



	Así mesmo, os populares móstranse preocupados polas anunciadas "actualizacións" de taxas que anunciou a concelleira socialista Sonia Méndez, e recordaron que "en plena crise non parece moi coherente subir a presión fiscal, senón que o apropiado sería axustar ao máximo o gasto para non ter que, agora, subir os impostos".

	Leccións do Partido Popular.- Os populares insisten en que, unha vez máis, o tempo dálles a razón. "Neste caso gustaríanos habernos equivocado, pero a realidade non sempre é a que queremos. Era evidente que o Concello ía reducir os seus ingresos por licenzas de construción en bastante máis do 15% que dicía o Goberno Local, pero a prepotencia e a soberbia o equipo de Orozco non deixa que ninguén lles axude, e prefiren insistir no erro que aceptar a man tendida dunha oposición responsable e comprometida con Lugo. Pénsanse que sempre hai unha intención oculta, pero o Grupo Municipal Popular demostrou máis que sobradamente que o seu único interese é o dos lucenses". Joaquín García Díez recordou que o seu grupo suxeriu unha redución das previsións nun 50% como mínimo, pero que se lles tachou de alarmistas e a concelleira chegou a dicir que non ía recibir "leccións" do Partido Popular. O portavoz do grupo lamentou que "nin leccións, nin consellos, nin axudas; toda iniciativa que veña do PP refúgase sen sequera mirala dúas veces, pero nós non nos desanimamos e seguimos traballando e facendo propostas en positivo".