O Grupo Municipal do Partido Popular pedirá a comparecencia urxente da responsable de servizos sociais, Carmen Basadre, para que informe das deficiencias detectadas no servizo de comida do fogar.

Sofía López Linares indicou que "verificouse que polo menos nalgunha ocasión fornecéronse alimentos con dubidosas condicións hixiénico-sanitarias" tal e como se recoñece no informe do expediente aberto polo Concello:

• Non se entregaron menús a distintos usuarios os día 26 e 27 de Maio de 2009;
• Deficiencias graves en etiquetaxe que provocan confusión aos usuarios (non se especifica si é un primeiro prato ou segundo unicamente identifícase con claridade a sobremesa; falla a data de consumo preferente e ata nalgúns casos nin tan sequera especifícase a data de caducidade dos alimentos);
• Menús sen adaptar á problemática específica de saúde dos beneficiarios do servizo; (diabéticos, cardiópatas, encamados, hipertensos").
• Non se entrega a todos o menú de subsistencia ou urxencia pactado (trátase dun avance na que se ofrece un menú a maiores dos sete semanais que se entregan);
• Non se facilita un xornal semanal que se comprometeu como avance;
• As comidas entréganse todas xuntas, nun único día e non en dous tal e como se recolle no contrato coa adxudicataria.

Sofía López Linares tamén explicou que no informe do goberno local o médico do Concello refire que a totalidade das persoas que visitou queixáronse "da mala elaboración e da escaseza da comida".

Situación moi grave.-

Os populares consideran "moi grave" esta situación, por iso é polo que pidan explicacións urxentes na comisión de benestar social que se celebrará o vindeiro luns. Dado que mañá mércores péchase o prazo para rexistrar iniciativas de pleno, Sofía López avanzou que pedirán tamén a comparecencia en pleno de Carmen Basadre pero xa adiantou que se as explicacións, na comisión prevista para o luns, son esclarecedoras retirarán esta iniciativa.

O Grupo Municipal Popular quere saber se esta é a primeira vez que se detectan deficiencias no servizo de comida a domicilio; tamén quere saber de que xeito o Goberno Local garante o correcto funcionamento do servizo e se corren algún tipo de risco os usuarios. López Linares pide que se expliquen "que medidas adoptou o Concello e desde cando son efectivas". A concelleira popular tamén reclamará os escritos que presentaron os usuarios do servizo para coñecer de primeira man o alcance deste caso.

Os populares recordan que o servizo de comida ao fogar utilízano persoas de entre 60 e 90 anos, con diferentes problemas de saúde e co agravante de que a maior parte deles viven sos. A empresa UCALSA S.A. é desde o pasado seis de marzo a adxudicataria do servizo.